الجمعة، 27 مارس 2009

أنا بعترض

بصرخ بعزم ما فيا ...........بصرخ وأستجير
ومش راح أسكت حتي ،، النفس الأخير
أنا بعترض ... انا بعترض
أنا بعترض ... وانا بعترض
أنا حرة أه ...مش جارية لااااااا............... دا شئ خطييييييير
من حقي أقول واسمع وأشوووووف حاجات كتير
البنت نص المجتمع يا مجتمع يامستنير
ازاي هعيش في سجن حضرتك الحرير...
-- ليكي اعتراض مرفوض يا بنت
ومفيش مناقشة أو تساؤل أو تمرد أو شغب
- مش لازم افهم واقتنع ؟؟
-- قلة ادب قلة أدب
-- متلبسيش
-- متخرجيش
-- متسرحيش
- ممكن سؤال؟
-- متسأليش
- ودي فيها ايه؟؟ انا بعترض
-- بتقري ايه؟؟
- ده شعر
-- لأ ممنوع مفيش...
يا ناس حرام ده كله ليه ؟؟؟؟؟؟؟
انا بعترض

اشمعني كله للولاد .............
وفين بقي حقوق البنات ...
من حقهم يختاروا وإحنا!!!!!!
يرمولنا الفتات
من حقهم يختاورا منا يخطبونا يخطفونا يشوهونا بحكايات ؟؟
هوا احنا شروة في سوق التلات؟
ــــــــــــــــــــــــــــــــــــــــــــــــــــــــــــــــــــــــــــــــــ

قريت في اعلان في الجرايد عن وظيفة بدون غرور
متفصلة عليا جدا واللي ناقص يطلبوني للحضور
قفلت بعنية السطور
لبست فستان شيك أوي
حطيت يادوب لمسة عطور
وجريت علي العنوان ،
لقيت الدنيا زحمة ،،، شئ خطير... فين النظااااااام؟!!
لازم يكون للأنسات طابور وللشبان طابور
ضحكوا عليا وسخسخوا
وقبل ما اتجنن وأثور ،،
شاورلي عالإعلان ولد وقاللي :
مكتوب للذكور ........
حتي الوظايف للذكور روخرا يا أصحاب السعادة!!!
ومادام كده بتعلمونا ليه وتدونا الشهادة؟
--شوفي يا بنتي : إحنا مش ناقصين وجع دماغ زيادة
البنت تتوظف سنة وبعدها تاخد أجازة للولادة
- ما بتاخدوا يا سيدي الأجازة للإعارة والاستفادة
ــــــــــــــــــــــــــــــــــــــــــــــــــــــــــــــــــــــــ

-- تتجوزيه
- أتجوزه إزاي..... معرفوش؟
-- أبوكي قال تتجوزيه وده قرار ماتنقشيهوش
- إزاي ياعالم أبقي زوجة لحد قلبي ما أختاروش
أحكي معاه ومفهموش ؟
-- أبوكي وافق وإدي كلمة
- يعني إيه؟
-- منحرجوش.
- أسفة بقي ..... أموت ولا أتجوزوش

ــــــــــــــــــــــــــــــــــــــــــــــــــــــــــــــــــــــ


تن تتتأتأ تن تأ تأ...


ــــــــــــــــــــــــــــــــــــــــــــــــــــــــــــــــــــــ


- أيوة عارفة ان انت جوزي
-- يا سلام عالمفهومية !!
- لما تبقي صح واجبي اني اطاوعك .. من عنية
بس لو مش صح واجبي ،، ان اقوللك ،، رأيي في صلب القضية
إحنا مش فازة في صالون
إحنا نص الإنسانية

انا نفسي أخلف بنت أحقق فيها ذاتي
كل ذاتي
نفسي أخليها تعيش حياة .. ماهيش شبه حياتي
أقعد معاها أسمع لها ،، وأديها أجمل توجيهاتي
- - أسف ياهانم .... من حقي تربية بناتي ما يطلعوش بالشكل ده


دي أغنية أسمها "أنا بعترض" معرفش أي حاجة عنها غير انها بتعبر عن شريحة المقهورات في المجتمعات الشرق أوسطية












هناك 12 تعليقًا:

S H A H يقول...

بحيي اعتراضك يا ميمي
وعجبتني كلام الاغنية جداا

تقبلي مروري

mimi يقول...

S H A H
والله شكرا شكرا ويارب تكون عجبتك زي ما عجبتني بالظبط

عبد من عباد الله يقول...

حلوه اوي بالرغم من ان فيها شويه افترا و كمان اكتر حاجه فيها مش صادقه بصراحه يعني ... موضوع الشغل ده

جميله و اختيارك حلو

mimi يقول...

عبد من عباد الله
=================

الله يكرمك .... ده محدش أخد باله من البوست ده غير شاه ... وتخيلت انها معجبتش حد خالص

لو سمعتها ... هتتجنن
رائعة وأسلوبها خطير في الغنا ...

ااااه لو اعرف أجيبها!!!!

تامر حسين يقول...

انا اعترض اذن انا موجود
مع تحياتي

mimi يقول...

تامر حسين
===============
انت موجود حتي من غير ما تعترض
انت صديق من زمان بس انت مش فاكرني

عاااااااااااااااااا

جارة القمر يقول...

للصوت الذي يعلو ويصرخ يعبر عن شخصية تأبى الظلم وترفضه


مقهورات كنا ولم نزل


مهضوم حقنا ومستساغ للآخرين


سنصرخ لعل صوت صرخاتنا يصم الظالمين


رائعة ياميماية


بعتذر عن التأخير

احترامي

غير معرف يقول...

حلوة الأغنية
ولو إن الفترة اللي إحنا فيها في مصر
عندنا الراجل هو اللي حقوقه مأكولة
مش القصد في إننا حننتقم بقي والكلام ده
بس أنا بقول إن وجود صراع من أساسه وإن في حد من الطرفين لازم يسيطر علي التاني ده فكر فاشل جداً
علشان كده كتير من حالات الطلاق بتحصل في مصر سنوياً
لإن الراجل حاطط ف دماغه إنه لازم يسيطر علي مراته
وده بيعمل تشتت كبير في البيت وبيكبر المشاكل (أنا مش حتجوز)

غير معرف يقول...

دي أغنية من التسعينات
اسم الفنانة سالي من البوم حكاية بنت
لم اتوفق في ايجاد اي معلومات عنها أو عن الألبوم لللأسف كأنها لم تكن!!!

غير معرف يقول...

اغنية لسالى من البوم حكاية بنت 1993 و اشهر اغنية كانت فى البوم مصورة فيديو كليب اسمها كان عندى ست سنين و سالى هى اول مغنية مصرية و عربية تغنى راب

Tarek Refaat يقول...

هل حد عنده الأغنية mp3 للتحميل ؟

Unknown يقول...

طيب بالله عليك يا كاتب كلمات الاغنية ممكن تنزل الاغنية لو حتى mp3 دايخ عليها مش لاقيها