تخاريف أكتوبرية

ألومك ليه؟


ألومك ليه
حبيبى أنا أولى ألوم روحى ... ولا أعذرها
وعارف ليه
عشان قدام عنيا حقيقة بنكرها
عينيك تايهين ... ايديك دى كأن اخر مرة همسكها
أساسا مين ... بقى بيهتم بالحاجة اما يملكها


ويا خسارة
محدش فينا نفذ وعد
يا خسارة ...
محدش فينا خاف م البعد

ومش حاسين بقيمة بعض


يا خسارة
حلال يا عمري ولا حرام
بنتغير مع الأيام
بقينا أتنين غراب عن بعض

بايدك ايه॥وانا بايديا ايه قولى وانا اتحمل

هقولك ايه..اكيد انت وانا كان نفسنا نكمل
ده بينا كتير ॥حاجات حلوة هتتحول خلاص ذكرى

ويمكن خير ..محدش دارى ايه مكتوبلنا بكرة
وياخسارة ..
محدش فينا نفذ وعد
..ياخساره
محدش فينا خاف م البعد
ومش حاسين بقيمه بعض
ياخساره
حلال يا عمرى ولا حرام بنتغير مع الايام
بقينا اتنين غراب عن بعض

।
।
।

هم اية اللى خرجهم من التحرير....!

والله العظيم اللى بيحصل دة حرام انا مش فاهمة بس هم رايحين بمصر على فين بتوع التحرير دول ما خلاص كل حاجة اتحققت ...مبارك بقى فى شرم الشيخ ....والعادلى وصفوت وسرور وكل الناس دول الفاسدين بقوا فى سجن طرة وان شاء الله يتحاكموا وعلنيا كمان بس هو ممكن ما نلاقيش لهم تهم لانهم كانوا بيسرقوا بالقانون بس دى مش مشكلتنا بقى !! وكمان الشرطة هتنزل بس لما توعدوها محدش يزعلها! ومش بس كدة يا جماعة دة كمان الاخوان بقوا الحمد لله صافى يا لبن حليب يا مرشد مع الداخلية والحكومة والمجلس العسكرى ..... انا اكيد بحلم ....هى دى مصر اللى كلنا حلمنا بيها يا جماعة ! ... حد يفهم بتوع التحرير ويقول لهم ارجعوا بقى ... لازم العجلة تمشى حتى لو مفيش اصلا عربية المهم العجلة تتدحرج !! انا بنزل الميدان على الساعة سبعة كدة فى الطراوة والاقيهم قاعدين وخيم ودرة مشوى ومنصات واغانى وحاجة فلة جدا انا عارفة انهم هيفتقدوا الاحساس دة وروح التحرير و كدة ... لكن مش معقول يعنى علشان هم يتبسطوا ويباتوا على الارض ويجوعوا ويعرقوا من الحر وكدة نقوم بقى نوقف حال المصيفين واللى عاوزين يشتروا ياميش رمضان او اللى عاوزين يتفرجوا على فيلم عربى بهدوء من غير فاصل اخبارى كدة او اشتباكات هناك- صح ولا اية؟ وبعدين ستة ابريل من حقها اكيد تزعل وتاخذ على خاطرها لان المجلس اتهمها بدون دليل بس فيه قانون فى البلد ينزلوا يرفعوا قضية على المجلس والقضاء يأخذ مجراه ويدينى ويديك طولة العمر انما بقى يعملوا مسيرة لوزارة الدفاع وكدة !! لا مينفعش برضوا لازم يكون فيه خط احمر - الجيش دة اخر عمود فى مصر- لازم تعرفوا كدة - ان مصر دى شقة اربع اوض وصالة والجيش دة العمود اللى اول ما تدخل من الباب على ايدك اليمين- ايوة حاااااااسب- اديك خبطت ! طب ليه كدة بس؟ ما احنا كويسين واهالى الشهداء كانوا قربوا ينسوا ....بتقلبوا عليهم المواجع ليه؟ وبعدين اية يعنى لما كام واحد يتحاكم عسكريا يا جماعة ؟ ماهو الجيش لازم يشوف شغله ويسترزق امال هيقعد فاضى يعنى لا محاكمات ولا فلوس هترجع ولا خطط ولا رؤية للبلد ولا اى حاجة طب الدول التانية تقول على جيشنا اية بس ! لازم يعمل منظر يا جماعة هيبة الجيش من هيبة مصر ولا انت مش مصرى هه انت ايوة انت مصرى ولا لا ؟؟ بجد بتوع التحرير انا بحبهم خالص وقلبى معاهم لكن هم كل شوية يغيروا كلامهم ويطلعوا بمطالب شكل مش معقول شوية اسقاط النظام وشوية اسقاط النائب العام طب حد يقول لى اية علاقة النظام بالنائب العام ؟ انا على فكرة طالبة جامعية ما تتريقش عليا؟ ولو اتريقت عليا تبقى بتتريق على التعليم الخاص فى مصر لان انا من جامعة اف واى ال ... احنا اللى بنجيب كل سنة عمرو دياب على فكرة فى الاوبننج بتاع الجامعة :) واية بقى موضوع العباسية دة؟ لا بجد كدة اوفر يعنى؟ انا لما شفت المنظر والله العظيم بكيت الجيش كان واقف يا حرام ورا السلوك الشائكة مرعوب يا اخوانا الطوب جاى من كل حتة الجيش ما اتعودش على الطوب والازاز الجيش بيتعامل مع مدافع وصواريخ ودبابات بس.... بجد ارحموه مش كدة ! واهل العباسية هيعملوا اية ناس نازلين يدافعون عن شرفهم وعرضهم لان المتظاهرين بيهددوا امنهم؟ المتظاهرين جايين من غير اى سلاح لكن معاهم يفط وبيقولوا هتافات بصوت عالى !! احنا فى اجازة من حق الناس دى تستريح!! وغير كدة اهالى العباسية عملوا اللى اى مواطن مصرى فى التمانين مليون هيعمله لو مكانهم دخلوا اوضة النوم فتحوا دلفة الدولاب اليمين طلعوا الشومة والمولوتوف وبعدين على المطبخ الدرج الوسطانى جابوا السيوف والسنج وبعدين على البلكونة جابوا جردل الطوب والازاز وعبروا عن نفسهم !! وكان فيه عند بعض الاسر شوية رصاص وقنابل مسيلة للدموع لزوم اعياد الميلاد والافراح وكدة انت عارف بقى المصريين واية حكاية امام مسجد النور الل كان بيعيط دة كمان وكان بيقول للجيش احموا المتظارين واضربوا ايد من جديد او حديد على البلطجية دة امام سيس صحيح وطبعا الجيش ملهوش فى العواطف دى ما عبرهوش وفضل بتوع التحرير يتربوا وكدة واصابات ودم ....يستاهلوا هم اية اللى خرجهم من التحرير ومن ايااااام انكل شفيق بنقول لهم اقعدوا وهنجيب لكم بونبونى طب عايزين اية تانى خدوا التحرير بس سيبوا المجلس فى حاله وبعدين انا عرفت ان فيه فى التحرير يا اما اهالى شهداء او ناس متضامنين معاهم ودول بجد لازم يروحوا لان انكل عصام قال انه بيعمل لهم صندوق فيه فلوس كتير وهيديهم ورغم اننا منهارين اقتصاديا لكن المجلس وانكل قلبهم حنين ومصر بلد مرزوقة دة احنا بنولع اعمدة النور طووول النهار واكيد بنطفيها بالليل.... ولا تسرفوا اما المجموعة التانية اللى فى الميدان فدول ولا عندهم بيوت ولا شغل ولا تعليم يعنى اجازة من كله طب والله لو طلعوا مارينا يومين هتفرق معاهم وهيرجعوا مبسوطين ويطلعوا مظاهرات تاييد للمجلس كمان ولو كان على السكن بجد مفيش اكتر من الكومباوندس فى مصر انا بجد بنصح بتوع التحرير من قلبى ...خلاص عملنا ثورة وهيصنا ....نرجع زى زمان بقى ملناش فى اى حاجة .... والمجلس لا يكل و لايمل من عقد صفقات هنا وسجن هنا وتخوين وتسخين هناك من اجل مستقبلنا من غير محاكمات و لا تقليب مواجع واعتبروا طنطاوى ابوكم.... دى اخر مرة هتكلم فى الموضوع بتاع التحرير واسكندرية والسويس والناس دول وعاوزة ارجع من المصيف الاقى الامور هادية وانا هتابعهم فى القناة الاولى واليوم السابع اصلى مش بثق غير فيهم.... وربنا يحفظ مصر مستقرة امنة ساكنة لا حس لها ولا خبر

أنا كدة ..

أنا كدة ..

العبارة في السفارة 2

العبارة في السفارة 1 هتلاقيه (هنـــــا)

جه معاد تثديم الأوراق المطلوبة في السفارة وهي:
صورة اول اربع صفحات من جواز سفري الساري
جواز السفر نفسه
صورتين شخصيتين
حجز طيران
تغطية تأمين سفر دولي
ورق يفيد الغرض من الدخول لإيطاليا

دي الطلبات الموجودة علي الموقع الإليكتروني للسفارة
دخلت الشيكارة
أأأقصد السفارة
وقدمت الورق اللي معايا وأخدن رقم
تخيلوا الريقم اللي أخدته كان كام؟؟
سامعة حد بيقول 13
هرد عليه وأقوله يااااريت
انا أخدت رقم 628
تقوللي ال 627 اللي قبلك جم أمتي ؟؟؟ انا معرفش
طب دول هيروّحوا الساعة كام
هقولكم برده معرفش !!
انا اخدت الورقة وتنحت ....
طبعا للكوسة والمحسوبية برده سككها في الحالات دي
يعني ناس جت بعدي ومش بتستني أشاسا
بتدخل علي القتصل عِدل
المهم ... كان فيه واحدة قاعدة جنبي .. شكلها مستنية برده
وماسكة في إيدها ورقة من فئة ال600 برده
مش فئة فلوسية
لأأأأ
فئة سفاراتيه
لسة بتقوللي " انا زهقت من القعدة دي رجلي وجعتني"
لقيت حد بينادي عليها في المايك
وجريت علي الشباك
وهيا خارجة بقولها " ربنا معاكي"
لقيتها بتديني ورقتها فئة ال600
وميلت عليا كإننا بنتاجر في الممنوع
أنا جاتلي واسطة دخلتني قبل الترتيب
خليها معاكي الورقة دي وأدخلي بيها
شكرتها وحسيت إنها إديتني أمل ...
أهو يعني 28 رقم فرق برده
أصل تحسوا إن اللي بيدخل جوا .. مش بيعرف يخرج

هيه وعدي اليوم ....

ولسة فيه أيام تانية في الشيكارة... أأقصد السفارة

العبارة في السفارة

هيا السفارة في العمارة
لأ
طب السفارة في العبارة ..
لأ
طب السفارة في الحرارة ..
برده لأ
طب إيه..
أنا هقولكم
السفارة في شارع الجلاء ......

نويت والنية لله .. أروح سفارة إيطاليا
علشان أخد ختم المحروس التشنجن علي جواز السفر بتاعي
قوم إيييييييييييه
اتصلت بالقنصلية أعرف تفاصيل أكتر
رد عليا واحد آخر جنتله
- حضرتك هتتصلي برقم فودافون 0900 معرفش كام وتاخدي رقم وتسيبي بياناتك وتيجي تلاقي إسمك ورقم جواز سفرك مع حارس البوابة تدخلي تاخدي رقم و تقدمي الورق اللي معاكي"
-- بس كده ..
- آه بس كده
-- طب إيه الورق المطلوب؟
- إدخلي علي الموقع بتاع السفارة هتعرفي كل حاجة..
-- بس كده
- آه بس كده
-- طيب أنا لوعايزة ......................... بيب بيب بيب

قفل ابن التييييييييت

بس والله دي خطوات سهلة جدا
اتصال ومشوار وهووووووب
التشنجن في إيديا يا عنيا

----------------------------
النهاردة إيه يا ميمي النهارده إيه يا ميمي ..
أها .. النهاردة الخميس
أما أقوم أتصل برقم فودافون 0900
أخ .. معنديش الخدمة دي في البيت
طيب اما اروح الشغل يوم السبت هبقي أتصل
رحت الشغل يوم السبت
وبتصل ... سمعت صوت مش بحبه خاااالص
** الرقم المطلوب غييييييير موجود **
يعني إيييييييه ... راح مشوار؟
طب مش يقول؟
عاااااااااااااااااااااا
اتصلت بالدليل ..
** أهلا بكم في الشركة المصرية للاتصالات .. هانم مسعود مع حضرتك ..**
-- أيوة يا هانم ..
- تحت أمرك يا فندم
-- إديني رقم تاني لقنصلية إيطاليا
-رقم فودافون 0900 ..
-- يا هانم مش بيرد ، بيقول غير موجود
- اتفضلي حضرتك رقم تاني ...

أتاري الناس اللي معايا في الشغل سمعوني بقول يا "هانم"
راحوا بيقولوا لبعض ( ميمي إتغيرت خالص ..بقت تتعالي علي الناس وووو ....)

قفشتكوااااااااا
يا عالم يا .... دي البنت إسمها كده..
أبوها سماها كده .. وشغلتها تقول إسمها كده ..
أنا مالي أناااااااااااا
وهوا لازم كلمتين فل كده ع الصبح

ياااااااارب

اتصلت بالرقم اللي الأستاذدة الآنسة / هانم إديتهولي
-- من فضلك الرقم 0900 مش موجود في الخدمة
- يا فندم الرقم خارج الخدمة جمعة وسبت
-- ايوة قول كده .. اتصل امتي؟
- من الأحد للخميس من 9 لحد 2
--شكرا ، سلام

يوم الأحد بتصل وبعد ما خد مني البيانات موظف فودافون
اللي لطعني لمدة 17 دقيقة علي الخط
وعلشان الدقيقة ب 150 قرش
والحسابة بتحسب
إداني المعاد اللي القنصلية قالت عليه
بس المعاد ..............
بعد ......... شهر
أيوة بعد شهر
يعني اللي عاوز يسافر لمؤتمر ولا يعمل عملية
ولا يزور حد من قرايبة .. لازم يتبع التعليمات
ويستني شهر

قلت مبدهاش بأه
أروح السفارة بنفسي .. الناس دي نصابة ولا إيه

اول ما قربت علي البوابة.. قرب مني واحد سألني سؤال غريب أوي
قاللي ( أخدتي معاد فودافون؟)
-- إدوني معاد بعد شهر
- أنا ممكن أجيبلك معاد قبل كده
-- إزاي؟
- مش إزاي..
-- أومال ؟؟
- ب 5000 جنيه
-- كااااااااااااااااااااام؟
- حضرتك المعاد القريب أجيبهولك ب 5000 جنيه
-- لا شكرا
- طب مش عاوزة ورقك يترجم إيطالي؟
-- شوكراااااااااااااااااااان

والبقية في الحلقة القادمة
.
.
.

مخلوقات تغزو مصر

ذكرت وكالة أنباء

" رينج باصالو "
أن هناك مخلوقات فضائية كوكبية حلزونية نهارية ليلية
أحتلت الأراضي المصرية
في توقيت الغدا
يعني قبل المغربية ..

والغريبة ..
الإحتلال شمل كل البيوت ...

ومفيش فروق فردية ...

والتقطت الكاميرات البطروخية

بعض الصور للكائنات المحتلة

أثناء نومها العميق في أطباق طائرة

محاطة بالخس والليمون

ملحوظة :
تظهر الكائنات وتلازمها أعواد من البصل الأخضر
ولا تفارقها أبدا ..

صورة ( 1) وتظهر فيها الكائنات اللولبية وهي تغط في نوم عميق علي الاطباق الطائرة

صورة (2) الأعواد الغليظة الملازمة للكائنات .. ربما تعمل عمل " الــ بودي جارد"

صورة (3) المخلوقات تنظر الي الكاميرا ... يا حفيييييييييظ

المخلوقات الرنجية تتخفي دائما في ستار من الليمون والخس ..

ربنا يستر .. ده إحنا في عيد يا جماعة.
.
.

العيدية أولا ..

كل عام وأنتم بخير ..

يارب بس تكفي
هههههه

عيد فطر سعيد عليكم
يااااااارب
.
.

رمضان كريم

كل عام وأنتم بخير
وتمنياتي لكم بقضاء شهر كله طاعه وتقرب إلي الله
ودعاء في كل وقت
ولا تنسوني من صالح دعائكم

أوعي حد ينسي ميمي ... أعيط أنا
.
.

حزروا فزروا

إبحث

ستجدني في أمامها لا خلفها ولا بداخلها

تجدني في عالمها ... لا في عالمك

أنا لست البئر ولا المنبع ، أنا العين

...

تجدني في خصامها ولومها ولا تجدني في فرحها

تجدني في المهام الصعبة ولا تجدني في المصاعب

إبحث ..

لاتجدني في الأماني ، ولاتجدني في الأمنيات

ولكن أبحث أكثر تجدني في الأمهات ..

هل عرفتم ما هذا ؟

.

.