الثلاثاء، 29 ديسمبر 2009

حصاد 2009



جريت الأيام بسرعة والسنة بتودعنا حبيت أعرض السنة دي كانت كويسة ولا لأ عليا


قلبت في صفحات السنة وكانت النتيجة ..: -


في يناير سنة 2009


***




أجتزت أول سنة في كلية الإعلام وبتقدير جيد جدا


وكانت فرحتي بالنتيجة دي فوق الوصف

في فبراير سنة 2009

***
أتعرفت علي أصدقاء لا يمكن أعرف أعوضهم تاني

وشرفت للدنيا " ملك" بنت أختي ... اللي بحسها بنتي تمام
كنت أول مرة أزور الأهرامات وأدخل هرم خوفو من الداخل
وأشوف حاجات في رحلة .. مش شفتها قبل كده

في مارس 2009

***
كتبت أول بوست ليا في مدونة ميمايا وكان بعنوان "من جديد "،
يعني رجعت للتدوين من جديد بعد ضياع الباسوورد مني للمدونة ميمايا الأولانية ..
وقررت أرجع للتدوين من جديد


في شهر أبريل ..
***
سافرت أسكندرية في أروع رحلة ليا مع أختي وأصحابي ،، كانت في شم النسيم ،، وكانت دي المرة الوحيدة اللي رحت فيها أسكندرية في السنة دي ، أصلي من عشاق أسكندرية صيفاََ


في شهر مايو ..

***

بدأت أجهز لسفري لأوروبا ... ودي كانت بالنسبة لي حلم حياتي اللي أتحقق الحمد لله وشاركني المدونين أصدقائي فرحتي وشاركوني رحلتي .. وشاركتهم أحلي لحظات في حياتي

في شهر يونية ..

***

سمعت أحلي كلام تكريم في حياتي في شغلي وكونت صداقات عالمية
وصداقات قوية جدا من المدونة ...

وناس معرفتهم كنوز بجد


في شهر يوليو ..

***
توطدت علاقاتي باصدقاء من المدونة ..

واتعرفت علي ناس .... أتمني ينوروا حياتي للأبد

في شهر أغسطس ..

***
حضرت أول لقاء تدويني مع ناس جميلة وأخلاق وثقافة وأدب

كتير منهم أصدقاء شخصيين للأن

وكان شهر رمضان والعيد الصغير ... طبعا أحسن شهر لينا في السنة

في شهر سبتمبر ...

***
أحتلفت معاكم بيوم ميلادي .. وكتبت بوست ليوم ميلادي أنا وأحمد توأمي


بعنوان تسعة سنة تمانين ...


وعملت علي مدونة ( إيد واحدة ) بوست "مواليد شهر سبتمبر" ...


وفرحت وفرحنا كلنا بيه علشان بجد كلنا كنا إيد واحدة ويارب نفضل كده علي طول .

في شهر أكتوبر ..

***

تم تكريمي في شغلي ، وحضرت دورة تدريبية في مجال التنمية البشرية ،

غيرت مسار أفكاري كتير ، وأخدت شهادة تقدير أعتبرها وسام من نوع خاص ليا ..


في شهر نوفمبر ..


***


أكتشفت أد إيه إحنا كلنا عندنا أنتماء لبلدنا ، وأد إيه زعلنا علي علم بلدنا ورمز وطننا اللي داسوه بالجزم الجزائريين ، ووقفنا مع بعض كلنا نقول إننا بنحب البلد دي ، بنحب مصر علشان دي وطن ،، مهما قست علينا في الأخر بتضمنا علي أرضها .. الإنتماء مفيهوش كلمة " ليه ؟ "


في شهر ديسمبر ..


***


توفي صديق غالي جدا علي قلبي ،، وأتمنيت أقوله كلمة وداع بس أكيد هيسمع دعواتي ليه


قابلت " سارة " اللي نورت مصر من السعودية ود " ستيتة "


و " مسدس أبو صلاح الصغير "


ويوم من أجمل الأيام اللي قضيتها في السنة ..


أكدتلي نظرية إن زي ما القطنة ما بتكدبش ...


إحساسي ما بيخيبش ..

*****
السنة عدت خلاص باقي عليها كام يوم وتيجي سنة جديدة

المدونة دي صاحبتني في كل يوم من أيام السنة ، أستحملتني ،

علشان كده أنا بحبها أوي ... بحس إنها أرشيف للذكريات ،

عدت عليا في 2009 طبعا أيام صعبة ودموع ،، بس الحمد لله دوام الحال محال


الإجمالي .. بشكر ربنا إني وهبني نعم كتير ،

قدرت أعرف قيمتها في أيام سنة 2009 وقدرت أدونها في مدونتي ميمايا


ليكم مني كل الحب وأتمني يارب كل أيامكم حب وخير وسعادة


أشوفكم السنة الي جاية علي خير


بـــاي بــاي يا عسولين

انتوا أحلي مدونين
كل سنة وأنتم طيبين

.

.

الاثنين، 21 ديسمبر 2009

أنا مخي بطاطس مقلية





في مخي بطاطس مقلية
وأفكاري ..معنداني شوية
ولما التركيز بيزيد أكتر
بشبه للفول .. والطعمية
****
أنا مخي .. بطاطس مقلية
****
أمسكلي ريموت .. يطلع تليفون
أعمل نعناع .. يطلعلي لمون
طبق الفاكهة ملياه بـزتون
يا دماغي يا حلة ملوخية
****
أنا مخي بطاطس مقلية
****
صحيت بدري ومن ستة الصبح
بلبس في هدومي الشتوية
وفطرت كباب وحمام محشي
وجريت علي شغلي الضهرية
أتارينا رمضان
في شارع حرّان
لسة في توقيت الصيفية


****
أنا مخي .. بطاطس مقلية
***
رحت لدكتور
غالي ومشهور
أكشف علي حالتي النفسية
أتاريه دكتور
عايش في الدور
في كلامه ولغته الحوارية ..
أسئلته بحركات مش هيه !!
دا طلع دكتور مش نفساني ..
والكشف ... مسالك بولية
****
انا مخي .. بطاطس مقلية
****
يمكن دا فراغ أثر فيا ؟
وأثر علي حالتي المزاجية
وأنا أعمل إيه ؟
دلوني يا ناس يا بلوجرية
وشي بأه أصفر.. زي العدس
وزيادة عليه التقلية
****
أنا مخي بطاطس مقلية
***
أنا عاوزة حياتي الطبيعية
ترجعلي زمان زي ما هيا
مش هحلم أبدا أكون غيري
لاحسن لو حلمي هيتحقق .....
هلقاني في علبة تونة صفيح
بس العلبة دي مصدية
أو كبشة رز في قلب رغيف
حباته مش متنقية
****


اه يا مخي يا سلطة بابا غنوج


فيها بتنجانة ومهرية


محطوطة في صلصة بارب كيو


في ميدان واسع متهوية


تاخد حتة ؟؟ أقطع إيدك


دي دماغ عالية وغالية عليا


ده أنا مخي بطاطس مقلية
****


.


.

الأحد، 13 ديسمبر 2009

مين قال إن القمر بنوتة ؟




مين اللي قال يا بشر


إن القمر .. بنوتة

سرحانة بخيالها ..حاضنة في إيدها الورد


وساندة علي التوتة ؟

مين اللي قال يا بشر


إن القمر .. بنوتة !!



ربطوا زمان القمر


برسوم .. لقط وفار


واتخيلوه شرير .... وعنيه تطأ شرار


أو بنت ماسكة الهون .. بتدق فتفوتة



مين اللي قال يا بشر

إن القمر .. بنوتة !!



أنا قمري ليا ولد


مليان أمان ورجولة .. بعتبره ضهر وسند .

يصنعلي ... قلبه وتد ... ومن عنيه برجولا

يحكيلي من غير حروف


أحلي كلام حدوتة



مين اللي قال يا بشر

إن القمر .. بنوتة !!

قالوا عليك يا قمر ... إنك بعيد عالي

أنا .. ..

مستغربة جدا !!!

أصلك ما بين إيدي .. لو جيت علي بالي

بتجيبلي أحلي هدية

بفيونكة مربوطة

مين اللي قال يا بشر


إن القمر .. بنوتة !!

أنا قمري دا راجل


بدقن وبشنبات

وضحكته الهادية


أجمل ما فيه بالذات


رقيق في إحساسه


ومشاعره فيها ثبات

وكإنه بسكوتة


مين اللي قال يا بشر


إن القمر .. بنوتة !!


.

.

السبت، 5 ديسمبر 2009

الملك والوزير ..




كان يا ما كان .. يا سادة يا كرام



ومايحلي الكلام إلا بذكر النبي عليه الصلاة والسلام



كان في سالف العصر والأوان .. ملك ..
عنده مملكة كبيرة فيها كل خير من خيرات الله
وقصر كبيييير وخيل كتير وأسطول كمان

والملك كان عنده وزير ..



الوزير كان حكيم وعاقل ورزين
والملك كان دايما ياخد رأي الوزير قبل أي قراريتخذه
مش ضعف من الملك ... لااااا ...
لكن ثقة فيه وفي عقله وتصرفاته

الملك في مرة دخلت شوكة في صباع رجله
فنادي علي الوزير وقاللـه :

- رجلي رجلي


إيه العمل دبرني يا وزير ..



رد الوزير :



- نستدعي الطبيب ، فجاء الطبيب



ووجد أن الأمر يستلزم بتر صباع القدم
وصارح الملك بالحقيقة دي

فسأل الملك الوزير الحكيم ..

- أعمل إيه دبرني يا وزير

رد عليه الوزير ..



- تسمع كلام الطبيب لعل في ذلك ... خير
[ لعله خير !! ]



واستسلم الملك لأمر الطبيب وقام الطبيب ببتر أصبع الملك



وارتاح الملك لمدة يومين ... وعلشان يحتفل بتمام شفائه ،
قرر يعمل رحلة صيد وياخد معاه الوزير

وافق الوزير علي رحلة الصيد ، وجهزوا كل شئ استعدادا لرحلة الصيد البرية



وقبل اليوم الموافق يوم رحلتهم .. تعب الوزير تعب شديد
وزادت درجة حرارته وتم استدعاء الطبيب للوزير

وقال الطبيب إن الوزير محتاج راحة لمدة أسبوع علي الأقل
وإنه مش هيقدر يتعرض لأي مجهود لأن المجهود خطر علي صحته

فكان الحل الوحيد إن الملك يروح الرحلة لوحده
من غير الوزير اللي هوا دراعه اليمين

و قال الملك للوزير: معلش علشان إنت مش هتقدر تيجي معايا رحلتي

رد عليه الوزير : [ لعله خير!! ..]

إتعجب الملك من كلام الوزير لأنه مش زعلان علي السفرية...
وسابه ومشي ..

ركب الملك حصانه مع الحاشية بتاعته

وفي نص الطريق طلعت عليهم عصابة من القراصنة اللصوص

ولما أفصح الحاشية عن هوية الملك ،
فرحوا القراصنة اللصوص بيه
لأنهم كانوا بيبحثوا عن قربان للآلهة بتاعتهم
وإن مفيش أقيّم ولا أفضل من ملك .... يقدموه قربان للألهة اللي بيعبدوها

وفجأة بعد ما وضعوا الملك علي مذبح القرابين أكتشفوا إن صباع رجله مبتور

فتراجعوا عن خططهم علشان مش يصح إنهم يقدموا قرابين معيوبة

فرح الملك بالقرار ورجعوا جري علي المملكة بتاعتهم ..
وأول شخص سأل عنه الملك هوا الوزير..

وحكاله اللي حصل فرد عليه الوزير : [ لعله خير !!]

راح الملك ساءله : ليه قلت [ لعله خير] لما الطبيب أمرببتر أصبع قدمي ؟

رد الوزير : قالـله علشان لو صباع قدمك مش مبتور
كان زمانك دلوقتي مذبوح علي مذبح نذور القراصنة

وسأله الملك : طيب أنت ليه لما مرضت ،
وكان مرضك خطير قلت [ لعله خير !!] ؟؟؟؟
إيه الخير في كده ؟؟؟؟؟؟؟

رد الوزير : أنا لو مش كنت مريض وجيت معاك ،

القراصنة مكانوش هيلاقوا أنسب من وزير الملك قربان ..
يقدموه نذر للآلهتهم
فــ ....
[لعله خير !!!!! ]
.
.
.