الجمعة، 10 أبريل 2009

طب ما يمكن....!!!


أنا كنت واقفة زي كل يوم مستنية الميكروباص وطبيعي أول ما وصل هجوم عليه ويا تلحق يا متلحقش كالعادة .. ولما ركبت ...السواق قفل الباب ورانا ... بس وأنا بركب شنطة إيدي خبطت في كتف واحد قاعد وفجأة لقيته بيقوللي

" حاسبي"....

الكلمة دي سمعتها كإني سمعت شتيمة وطول الطريق وأنا كأني مرتكبة جريمة ... وأقول لنفسي ...

طب ما يمكن الخبطة جت جامدة فيه ..

ولا يمكن سن القلم الرصاص اللي جوا الشنطة خربشه ..

أو طب ما يمكن مبرد الضوافر كان هيدخل في عينه ...

ولا يمكن الراجل ده تعبان وقرفان ومخنوق ومتضايق ...

بس يرجع شيطاني يقوللي " يعني الناس ماتستحملش بعضها شوية يعني؟"

بس يمكن الراجل ده معقد ومش طايق البنات ..

زمانه بيقول لنفسه ايه خرجهم من بيوتهم دول !!

ولا يمكن ولا يمكن ولا يمكن ... ألف يمكن سكنت في عقلي ..

لحد ما قررت أعمل موقف فاصل يقتل الأفكار السودة اللي في دماغي دي

وكمان أثبتله انه غلطان وأخلي ضميره يأنبه .. وبدأت أنفذ الخطة ....

رحت مخبطه علي كتفه وقلتله بكل ذوق :

- " علي فكرة أنا أسفة أوي"

- " علي إيه حضرتك"

- " يعني أنا مأخدتش بالي وحضرتك قلتلي حاسبي"

- " لأ أنا قلتلك حاسبي .... علشان الباب كان هيقفل علي إيديكي"

حسيت بعدها إني معنديش لسان ينطق ولا عندي عقل يفكر .. وأد ايه الراجل ده كان فعلا يستاهل مليون أسفة مش علشان خبطت فيه لأ علشان بس ظنيت فيه !!!!

وعرفت وقتها إن فيه مواقف كتير عدت عليا وزعلتني وأنا اللي فاهمة غلط أصلا ...

ومن ساعتها أي حد يعمللي حاجة تعكر مزاجي أقول علي طول ... طب مايمكن !!!


هناك 25 تعليقًا:

MǿиY El-Shreef يقول...

تصدقي طب مايمكن فعلا

رغم ان في ناس قليله الذوق

بس لازم نقول مايمكن ونلتمس الاعذار

اهو الجو الخنقه والعدائي ف وسائل المواصلات عموما يخف بقى شوية

marwan يقول...

عارفة يا ميماية انتى كلامك صح بس مش حنفترض علطول حسن نية الآخرين يمكن الاستاذ دة طلع ذوق وخايق عليكى من باب الميكروباص بس فى ناس تانية ممكن تقابليهم فى يومك مثلاً فى السوبر ماركت بمجرد أن عربية الطلبات تقرب منهم ما تسلميش من لسانهم وانا كنت دايماً برد وألوم واحياناً إذا حد زعق وعلى صوته اقابلة بالمثل لحد ما اصبحت شخص عدوانى سليط اللسان وبعد كدة لقيت نفسى انا ايلى حخسر مش هما علشان كدة دلوقتى بحاول اسيطر على اعصابى واسيب كل واحد يعترض ويزعق زى ماهو عايز طالما انى ماضيقتوش بجد علشان ما اخسرش نفسى وابقى حد بشع لا يطاق

mimi يقول...

الي موني ::
هقوللك علي حاجة.. هتلاقي في شهر رمضان فيه حالة من الهدوء النفسي جميلة جدا في الناس وتلاقي الناس متسامحة جدا لحد يوم الوقفة باليل وبعد كده الناس ترجع زي الأول تتنرفز وتتعصب علي أي حاجة وانا قريبا هعمل إحصائية تأثير الحر علي المشاحنات بين الناس .. وهطلب ان يكون من حق كل مواطن تكييف محمول علشان الأعصاب متبوظش أكتر من كده.. لإيه رأيك بقي؟


ـــــــــــــــــــــــــــــ

الي مروان::
كلام جميل وكلام معقول مقدرش أقول حاجة عنه
بس بجد لسه الدنيا فيها الخير ليوم الدين

marwan يقول...

هاى ميماية عاملة اية على فكرة مدونتى
www.alhakeka-marwan.blogspot.com
زرونا تجدوا ما يسركم

أبو أمك يقول...

يمكن يقصد حاسبي يعني ادفعي الأجرة

قلب ارهقته الاحلام يقول...

فعلا فيه حاجات كتير يمكن بنفهمها غلط

وبنضايق جدا ف وقتها مع اننا لو حاولنا نفهمها

بطريقه تانيه يمكن كان الوضع اختلف

بوست جميل ياميمي ونورتي مدونتي ياجميل

تحياتي ,,,

... amr يقول...

للأسف الواحد كتيير بيقع في المواقف دي و بيفتكر حاجة ممكن تكون غلط .. بس نجيب طولة البال منييييييييييين بس !!! :)

أحسن تـستاهـل يقول...

انا حصلتلي الموقف دي قبل كده.. مواقف من اللي تحسي انك مكسوفة كده وظنيتي ف حد ف حاجة وحشة وهو يطلع حد زي الفل.. ياللا معلش هههههههههههههه

مها ميهوووو

اسامه عبدالعال يقول...

نورتى عالم التدوين يابنت منطقتى

البوست ده فعلا فكرته هايله وبحييكى عليه

واتمنالك التوفيق فى عالم التدوين

Dr.A.S. black armor يقول...

بجد عقل لماح جدا ورائع البوست
لان فعلا كتير بتمر علينا المواقف واحنا اللى فى الاساس بنكون فاهمين غلط
بس هو فى الحالة دى بيكون الخطأ مشترك
خطا على اللى اتكلم لانه ماقدرش يوصل كلامه مظبوط
وخطأ على اللى استقبل الكلام لانه لم يستوضح معنى الكلام من المتكلم
وده اساس فى علم التواصل بين الناس communications
دمتى بخير وشكرا لزيارتك

mimi يقول...

أبو أمك ::::
ــــــــــــ
لو جت في بالي الفكرة دي للحظة مكنتش اترددت في اني أقوللـه " ما تحاسب أنت "!!!

ـــــــــــــــــــــــــــــــــــــــــ
قلب أرهقته الأحلام ::::
ـــــــــــــــــــــ
أهو ده الغرض من كتابة البوست ده ... ودايما نسيب مجال لكلمة يمكن ... طب ما يمكن بجد
مدونتك رقيقة زيك

ــــــــــــــــــــــــــــــــــــــــــ
amr ::::
ــــــــ
طولة البال دلوقتي بتتباع في كارفور بس معلش هتتعب شوية أصل عليها طابور
شكرا لمرورك ونورت
ــــــــــــــــــــــــــــــــــــــــــ
أحسن تستاهل ::::
ــــــــــــــــ
مها ميهووو
انا كمان مها ميهووو
مش قلتلك ؟؟!!!
ــــــــــــــــــــــــــــــــــــــــــ
أسامة عبد العال ::::
ــــــــــــــــــــ
أنت كمان اتمنالك كل التوفيق
مدونتك جميلة ومختلفة
مش مجاملة .. بجد يا بن منطقتي
ــــــــــــــــــــــــــــــــــــــــــ
Dr.black armor:::
ـــــــــــــــــ
أنا بدرس COMMUNICATIONS في كلية إعلام
وشكرا شكرا لكلمة " عقل لماح " دي بعد كده هخلي عيني في نص راسي
نورت ميكروباصي أأقصد مدونتي

Zika يقول...

من غير فشر انا من الاول توقعت النهايه دي
وقولت طب ما يمكن بيقولك حاسبي لا تتخبطي انتي
طب ما يمكن

Zika يقول...

اه صحيح واضح ان المدونه جديده
مبروك المدونه وطريقتك حلوه علي فكره
انا خدت لفه زي مانتي خدتي لفه عندي كده
اللفه عندك بكام ؟

mimi يقول...

زيكا
ــــ
يا راجل يا متمكن ( من غير فشر)
واللفة بخمسة جنية والحسابة بتحسب

الشنكوتي الكبير يقول...

ايوه صحيح
مشيها يمكن
وحقك عليا

عمك ياض يقول...

ماشاء الله بجد تدوينات حضرتك خفيفه جدا ومفيده جدا في نفس الوقت

ياريت حضرتك تعمللنا بوستات جديده دايما :)

mimi يقول...

عمك ياض
ـــــــــــــ

انت تأمر وانا انفذ

منور البوستات كلها وشكرا ليك

تامر حسين يقول...

تصدقي موقف غريب
بس حسبي بعد كده
ياسلام لو كل الناس يفكرو بنفس المنطق مكنش حد جاله ضغط
تحياتي

أحمد عاطف يقول...

السلام عليكم ورحمة الله وبركاته

من ساعة ما خبطتي على كتف الراجل وانا مستني انك تتخانقي او انه يقول كلمة مش مظبوطة تقومي مطلعه القلم بجد وغزاه بيه

لحد ما اكتشفت انه فعلا طب مايمكن

اسلوبك القصصي رائع في تسلسله البسيط وبراحة كده بتعرفي تسحبي العقل للمنطقة المراد الاشارة اليها

رغم انك بتحكي موضوع حقيقي الا ان اسلوبك رائع

تقبلي مروري وتحياتي

mimi يقول...

تامر حسن
=============

والله شكرا علي اللفة اللي أختها في المدونة ، عارفة إن اللي ساعدك انهم كام موضوع يادوب
أعزك الله ... ودائما علي اتصال ان شاء الله ...

وبعدين ممكن الواحد يشغل باله بأفكار وتطلع حساباته غلط ويظن في حد وبعدين يطلع غلطان وميعرفش يعوض اللي فات ...
تحياتي ليك

شكرا

mimi يقول...

أحمد عاطف
=============
وعليكم السلام ورحمة الله وبركاته..
والله كلامك رفع معنوياتي جداااا

والحمد لله إن الهدف من كتاباتي وصللك

أنا مش بكتب علشان الضحك بس ،، أنا بحاول بأسلوبي أوصل رسالة بس في شكل كوميدي

ربنا يجازيك خير
وشكرا جداااا

زقطـوطـة يقول...

: )))
بجد أنا سعيدة بالمدونة دي
إضافة جميلة جدا ليا
بجد إنتي هايلة
أسلوب سردك راقي و بوستاتك كلها ليها مغزى و هدف جميل
بجد سعيدة جدا
سيبيني بقى أمشي رجلي في باقي البوستات
: )

mimi يقول...

زقطوطة
===========
انا لقيت التعليق اللي فكرتيه وقع منك...
أتاريه هنا برده مش عند حد غريب

وربنا يخليكي يا سكرة

نورتي صفحة تعليقاتي كلها

مامة مازن يقول...

ميمى عسل جدا
هو فعلا اللى يقدر ما يتعبش على راى حماى الله يرحمه يعنى قدر الخير تقوم متشغلش دماغك بافكار تانية
سلام يا ميمى

هبة الله محمد يقول...

ساعات كتير بنفهم الناس غلط يسلم قلمكك