أنا بحب أحمد

لحسن الحظ أنا عندي أخ توأم

أيوة إحنا أتنين توأم .. ولد وبنت .. مولودين بيننا خمس دقايق بس ...

توأمي أسمه ( أحمد ) ...

بابا سماه (أحمد) عشان أخوه اللي استشهد في حرب أكتوبر 73 ... واللي بعد استشهاده قرر أهل الحي اللي ساكنين فيه إنهم يطلقوا أسمه علي الشارع اللي كان ساكن فيه ... وبالفعل تم إطلاق أسمه علي الشارع وكمان علي أسم مدرسة بالإضافة الي النادي الإجتماعي

وبالتالي أصبح عنوان الشارع : -

#شارع الشهيد أحمد بجوار مدرسة الشهيد أحمد أمام نادي الشهيد أحمد الإجتماعي#

ماما بقي .. كانت تعبانه أوي في تربيتنا ... علشان إحنا اتنين ..

بنصحي مع بعض و بننام في نفس التوقيت تقريبا ..

مامتي استعانت بأخوها اللي هوا خالي يقعد معاها شوية ويساعدها ..

خاصة أنه كان طالب في الجامعة وقتها وعنده وقت فاضي في الأجازة ..

خالي كان أسمه ( أحمد) ...

أنا طبعا بحب توأمي .. ( أحمد )

وبحب عمي ( أحمد ) اللي ما شفتهوش ،

بحبه علشان كلام الناس عليه وعلي شجاعته وأخلاقه ..

وبحب خالي ( أحمد ) علشان هوا اللي مربيني ...

وعلشان كده كل عمامي أطلقو أسم ( أحمد ) علي ابنائهم

فأصبح لي 4 أبناء عموم أسمهم ( أحمد) تخليدا لذكري عمي الشهيد

وتوفي خالي ... فالبقاء لله

فأطلقت عائلة والدتي أسم ( أحمد ) علي أبنائهم تخليدا لذكري خالي

لذلك أصبح لديّ 4 أبناء خالات أسمهم ( أحمد)

كبرت .. وكبرت .. وكبرت..

دخلت الجامعة ... وكان أول صديق وأخ أسمه ( أحمد ) .. وقف جنبي وساعدني في الدراسة والشغل وكل حاجة ...

أتخرجت من الجامعة ... وبدأ أسم ( أحمد ) معايا يشكل حاجة حلوة بمجرد سماعه

واشتغلت... قابلت مديري في الشغل لأول مرة ..

واكتشفت بالصدفة البحته إنه ساكن في الحي بتاعي .. قلتله " كويس إنك مش أحمد"

وحكيتله باختصار قصة أسم أحمد في حياتي ... لقيته ضحك ..

قلتله " ايه يا مستر هما بيندهوللك بأحمد" ؟

قاللي لأ ... أصل رئيس مجلس الإدارة أسمه ( أحمد ).... وعامل اجتماع وعاوزك ...

في الاجتماع طلب مني رئيس مجلس الأدارة ( أحمد ) إني أكون ضمن المرشحين للحصول علي منح دراسية

" تنمية بشرية"

أخترت أدرس ترجمة بالجامعة الامريكية ... ووافق المجلس ...

في أول محاضرة ليا قابلت مدرس دكتور يستاهل لقب بروفيسور بجد .. شخصية قوية

حزم .. قدرة علي الإقناع رائعة ... تفاهم ... شخصية جبااارة ... ومع كل ده ..

متواضع وذكي ومتفاني ومحترم ..

واصبح لي منذ اليوم الأول قدوة حسنة في السلوك وطريقة التفكير

وكان أسمه ( أحمد ) .....

أحمـد الأخ

أحمـد العم

أحمـد الخال

أحمد ابـن العم

أحمد ابـن الخال

أحمد الصديق

أحمد الرئيس

أحمد القدوة

الأسم ده لما بسمعه .. بحس بالأمان والإطمئنان

بحس براحة ...

بحس إن مجرد الأسم ده ... يعني لي الثقة ..

بحس بسعادة ..

أنا بجد ...

بحب الأسم ده

أنا بجد ....

أنا بحب ( أحمد )

.

.

.