الاثنين، 1 يونيو 2009

قلبي للإيجار .. مين يأجره ؟




انا بعرض قلبي للإيجار ،


مين فيكو قال .. هأجره ؟
ده كلام بجد ومش هزار ..
دا خبر جديد ... بفجّره .

قلبي الضعيف ...
دا قلب مليان بالحنان .
والحب بس يحرره .
أربع منافـع للأمان ،،
بتمن بسيط هتقرره ....

مين راح يقول .. هيأجره ؟

قلبي الحبيب ...
دا قلب طيب وابن ناس .
مش من دهب ولا حتي ماس .
بينجرح مرات كتيييير..
ونفس الغلط بيكرره ...
مين فيكو قال .. هيأجره ...؟

قلبي الرقيق ...
كان لِيه صُحاب بيحبهم .
في الشدة واقف جنبهم .
سابوه وراحو كلهم ..
من غير ما حتي يبرروا .
مين فيكو قال .. هيأجره ؟

قلبي الغبي ..
آل قلب راسي ..
بيتهزم .. وكأنه ناسي ..
وأعتب عليه ..بيقوللي ليه ؟؟؟
عملت إيه !!!؟؟
ونفس السؤال بيكرره


مين فيكو قال .. هيأجره ؟

قلبي الجرئ ....
ما بيتخنق من أي شئ...
لِيه مبدأ إنه يعيش صديق.
طيب بأه .. خليه كده .....
غدر الصحاب .. هيفكره .


يا مين يقول ... هيأجره ؟

قلبي العبيط ..
تاخدوه ببلاش ...؟؟
تستبدلوه بأتواب قماش؟؟؟؟؟
موافقة جداً ...
ولا عمري يوم أستخسره ..


مين فيكو قال هيأجره ؟

قلبي بمشاعره منه فيه..
لا تلاقي زيه ولا تلاقيه ،،


طب أعمل إيه !! مولوده بيه..
ما تأجروه ... هتوفروا ...


لو هتبيعوه هتكسبوا ولا تخسروا ..
طيب بقي ......!!!!




مين فيكو قال هيأجره ؟


؟

؟

؟

هناك 218 تعليقًا:

‏«الأقدم   ‏‹أقدم   ‏201 – 218 من 218
mimi يقول...

كيكى عوووووو...
=====================

ترجعي بألف سلامة يا كيكي .... وشكرا انك قولتيلي علي السرقة بس مش عارفة اعمل حاجة

حسبي الله ونعم الوكيل

شكرا يا شبراوية يا جميلة .... يا عسولة

حبيبتي جزاكي الله خير

mimi يقول...

غير معرف...
"بانارز
يعنى لافتات"
طيب يعني ايه لافتات ؟؟؟؟؟؟؟؟؟؟؟؟؟؟؟؟

mimi يقول...

أحمد عاطف...
===================

الايجار للأبد لمن يملك قيمة هذا الايجار

انا كنت ناوية ارجع لحكاوي الميكروباص تاني وانت شجعتني

ربنا يكرمك يارب

وشكرا جدا ان مدونتي عجبتك

mimi يقول...

ساره...
===========
سارة حبيبتي منورة والله
دمتي بكل حب ويارب تزوريني علي طول

mimi يقول...

قلب ارهقته الاحلام
=====================

دودو
انت كمان وحشتيني ... النت كان فاصل بس شوية
بس رجعت الحمد لله ........ نياهااااااااااااا
مش ناسية الجايزة بتاعتك خالص

mimi يقول...

اسماء واحلام فى وجدانى...
============================

رجعت يا أحمد تاني خلاص ....

الحمد لله ربنا يخليك لينا وتسأل عننا دايماااااااااا

mimi يقول...

همس الاحباب...
====================
خالد انا بجد الحمد لله كويسة

تسلم ويسلم سؤالك عليا يارب

دمت بكل ود

mimi يقول...

حلـم،،..
================

ايه الكلام الحلو اوي ده ... لأ مقدرش علي كده
بجد ربنا يديم المحبة ان شاء الله
اسفة علي تأخير الزيارة بس النت كان فاصل

mimi يقول...

كيكى عوووووو...
===================

حبيبتي معلش اتاخرت ... كنت تعبانة شوبة

mimi يقول...

yoyo...
==============
يويو
حبيبتي ربنا يسعدك يارب ويخليكي لينا ... تسألي علي اصحابك واخواتك
ربنا ميحرمنيش منك يا سكرتي

mimi يقول...

وردة...
============
وردتي
الله يسلمك والله يبارك فيكي ... تحياتي ليكي يا سكرتي وانا رجعت خلاص
موووواه

mimi يقول...

أبو أمك...
=================

جدي العزيز ..... وحشتني والله بقالك فترة كبيرةةة جدا مش ظاهر كنت فين؟؟؟؟؟

انت رديت يتعليق أحلي من البوست اصلا .... كده هنتنافس .... بس كلماتك عسل
حمد الله علي السلامة

mimi يقول...

فكرة من الزمن ده...
=========================

حبيبتي انا الحمد له بقيت احسن وعلي اتم استعداد لاحتلال اي مدونات
نياااااااااااااااااااااهااااااااااااااااااااااااا

mimi يقول...

MaNoOoSh...
====================

معلش يا منووووووووووش
اسفة علي التأخير
غصب عني والله

mimi يقول...

فراشة...
===============
انتي وسرب فراشاتك حبايب قلبي
بحبك في الله يا سكرة

انا رجعت تاني
نيااااااااااهاااااااااااااااا

mimi يقول...

اعتذار
===========
=======
===
سامحوني لو فيه حد من اصدقائي مش رديت عليه .... سامحوني واسفة علي الـتأخير .... ميمي ميمايااااا

غير معرف يقول...

لو انتى اللى كاته الكلام دة يبقى الله ينور عليكى قلمك زى الفل بس المواصفات دى خسارة تكون للايجار و ان كان لابد يبقى يتعمل عليه مزاد مش بالفلوس لكن بحسن النفوس
ربنا يوفقك

اتمني الشهادة يقول...

قلبك لا يثقل بمال... قلبك قلب ياخدة ويعيش بيه إنسان... ويقول لطيبته وحنانه اديني كمان وكمان..
ربنا يمتعك بحب صادق من محب صدوق...

تقبلي مروري الأول علي مدونتك وكل احترامي

‏«الأقدم ‏‹أقدم   ‏201 – 218 من 218   ‏›أحدث ‏أحدث»