جريت الأيام بسرعة والسنة بتودعنا حبيت أعرض السنة دي كانت كويسة ولا لأ عليا
قلبت في صفحات السنة وكانت النتيجة ..: -
***
أجتزت أول سنة في كلية الإعلام وبتقدير جيد جدا
وكانت فرحتي بالنتيجة دي فوق الوصف
في فبراير سنة 2009
***
أتعرفت علي أصدقاء لا يمكن أعرف أعوضهم تاني
وشرفت للدنيا " ملك" بنت أختي ... اللي بحسها بنتي تمام
كنت أول مرة أزور الأهرامات وأدخل هرم خوفو من الداخل
وأشوف حاجات في رحلة .. مش شفتها قبل كده
في مارس 2009
***
كتبت أول بوست ليا في مدونة ميمايا وكان بعنوان "من جديد "،
يعني رجعت للتدوين من جديد بعد ضياع الباسوورد مني للمدونة ميمايا الأولانية ..
وقررت أرجع للتدوين من جديد
في شهر أبريل ..
***
سافرت أسكندرية في أروع رحلة ليا مع أختي وأصحابي ،، كانت في شم النسيم ،، وكانت دي المرة الوحيدة اللي رحت فيها أسكندرية في السنة دي ، أصلي من عشاق أسكندرية صيفاََ
في شهر مايو ..
***
بدأت أجهز لسفري لأوروبا ... ودي كانت بالنسبة لي حلم حياتي اللي أتحقق الحمد لله وشاركني المدونين أصدقائي فرحتي وشاركوني رحلتي .. وشاركتهم أحلي لحظات في حياتي
في شهر يونية ..
***
سمعت أحلي كلام تكريم في حياتي في شغلي وكونت صداقات عالمية
وصداقات قوية جدا من المدونة ...
وناس معرفتهم كنوز بجد
في شهر يوليو ..
***
توطدت علاقاتي باصدقاء من المدونة ..
واتعرفت علي ناس .... أتمني ينوروا حياتي للأبد
في شهر أغسطس ..
***
حضرت أول لقاء تدويني مع ناس جميلة وأخلاق وثقافة وأدب
كتير منهم أصدقاء شخصيين للأن
وكان شهر رمضان والعيد الصغير ... طبعا أحسن شهر لينا في السنة
في شهر سبتمبر ...
***
أحتلفت معاكم بيوم ميلادي .. وكتبت بوست ليوم ميلادي أنا وأحمد توأمي
بعنوان تسعة سنة تمانين ...
وعملت علي مدونة ( إيد واحدة ) بوست "مواليد شهر سبتمبر" ...
وفرحت وفرحنا كلنا بيه علشان بجد كلنا كنا إيد واحدة ويارب نفضل كده علي طول .
في شهر أكتوبر ..
***
تم تكريمي في شغلي ، وحضرت دورة تدريبية في مجال التنمية البشرية ،
غيرت مسار أفكاري كتير ، وأخدت شهادة تقدير أعتبرها وسام من نوع خاص ليا ..
في شهر نوفمبر ..
***
أكتشفت أد إيه إحنا كلنا عندنا أنتماء لبلدنا ، وأد إيه زعلنا علي علم بلدنا ورمز وطننا اللي داسوه بالجزم الجزائريين ، ووقفنا مع بعض كلنا نقول إننا بنحب البلد دي ، بنحب مصر علشان دي وطن ،، مهما قست علينا في الأخر بتضمنا علي أرضها .. الإنتماء مفيهوش كلمة " ليه ؟ "
في شهر ديسمبر ..
***
توفي صديق غالي جدا علي قلبي ،، وأتمنيت أقوله كلمة وداع بس أكيد هيسمع دعواتي ليه
قابلت " سارة " اللي نورت مصر من السعودية ود " ستيتة "
و " مسدس أبو صلاح الصغير "
ويوم من أجمل الأيام اللي قضيتها في السنة ..
أكدتلي نظرية إن زي ما القطنة ما بتكدبش ...
إحساسي ما بيخيبش ..
*****
السنة عدت خلاص باقي عليها كام يوم وتيجي سنة جديدة
المدونة دي صاحبتني في كل يوم من أيام السنة ، أستحملتني ،
علشان كده أنا بحبها أوي ... بحس إنها أرشيف للذكريات ،
عدت عليا في 2009 طبعا أيام صعبة ودموع ،، بس الحمد لله دوام الحال محال
الإجمالي .. بشكر ربنا إني وهبني نعم كتير ،
قدرت أعرف قيمتها في أيام سنة 2009 وقدرت أدونها في مدونتي ميمايا
ليكم مني كل الحب وأتمني يارب كل أيامكم حب وخير وسعادة
أشوفكم السنة الي جاية علي خير
بـــاي بــاي يا عسولين
انتوا أحلي مدونين
كل سنة وأنتم طيبين
.
.
هناك 42 تعليقًا:
وانت طيبة وبخير
ان شاء الله تكون 2010 أحسن وتحققي فيها كل ما تتمنين
تحياتي لك
لو كان كل اللي فيكي
حماسك
ابتسامتك
تفاؤلك
سرعة أدائك
ده كفاية واكتر من كفاية اني أحبك
فما بالك صفات تانية كتير كتير علشان احبك
فعلا تتحبي يا ميمايا
ملأ الله سنتك القادمة بالأفراح والنجاحات
وربنا يجعلها لنا كلنا سنة زي الفل إحنا وبلدنا
بجد انتي رائعة
كل عام وانتي بألف خير ياقمري
سنة جديدة وحلوة عليكي
وكلها خير يارب
مش هاعرف ارد بجد
لسبب بسيط
انا كنت متفق مع سارة و معاكي اول ما تظبطوا ميعاد كلموني
ومحدش عمل كده اشاسا و سافرت امبارح قبل ما اشوفها
الحركة دي بصراحة ضيقتني جدا
وبرضه
كل سنة و انتي طيبة و سنة جديدة كويسة
ميمايتيييي
وحشتيني
كل سنة وانتي بالف خير وسنة سعيدة عليكي يارب
ميمايتي هو انتي مخاصماني علشان كده مارديتي عليا؟ لما كنتي اون لاين
ولا مااخدتي بالك
بحبك اوي
كل سنة وانتى طيبة
ايه الانجازات الحلوة دى
وبقالك ليه مدة مش بتظهرى؟؟
على العموم انا دلوقتى اطمنت عليكى
ويارب السنة اللى جاية تكون احسن
ميمي
انا سعيده بيكي
وسعيده انك صديقنى
وانا احساسي كمان مايخيب
من تعليقاتك عرفت انك انسانه قمه في كل شئ .. وكان احمد الهامي وسيط
الصداقه اللي ان شاء الله بتضل الي الابد
يارب ما يحرمنى منك يا اجمل صديقه تعرفت عليها عام 2009
كل سنه انتى بخير وسعاده
مشتاقه لك والله
ميمايا العسل
السنه كانت احلى لانك موجوده فيها
ويارب يارب سنه 2010 تبقى اسعد عليكى وتحققى حاجات اكتر وافضل
ربنا يسعدلك ايامك
ويارب اشوفك فى 2010
هههههههههههههه
و في السنه دي كمان اتعرفت انا كمان على احلى ميمي 2 على اعتبار طبعا اني انا ميمي 1 هههه طيب طيب بلاش زعل انتي ميمي 1 و انا 2 امري لله
كل سنه و انتي طيبه و منوره ميمايا على طول
ميمى الحبيبة
كل سنة وانتى طيبة
ويارب يارب تكون السنة الجاية
من اجمل السنين عليكى وتحققى فيها
كل امالك
والله ياميمى بحبك من قلبى
ودايما فاكراكى بالدعاء
ودعواتك ليا ياقمر
تحياتى
هابى نيو ير يا سكرايه
كل سنه وكل يوم وكل لحظه وانتى
طيبه زى ماانتى
جميله زى ماانتى
جدعه زى ماانتى
تعرفى ياميمى
باشوف فيكى جدعنه الاسكندرانيه
وباشم في مدونتك ريحة البحر
من الاخر كده انا بحبك قوووى
كل سنة وانتى طيبة
يارب السنة اللى جاية تبقى احلى واجمل
دمتى بكل حب وسعادة
كل سنة و إنتى جميلة يا ميمايا
يا بسكوتايا
كن جميلاً ترى الوجود جميلاً
و إنتى شايفة من الدنيا الخير
عشان قلبك كله خير
ربنا يجعل كل سنينك زى السنة دى و أحسن و اكثر إنجازاً يا حبيبتى
أنا من الناس اللى مكتوب عنهم كام سطر و بتشرف باليوم دا اللى كان من العمر فعلاً و لا ينسى بكل من فيه
ربنا يحلى كل أيامك يا حبيبتى
بوسة و حضوناااااااااااات للسنة الجاية بقى
كل عام وانتي بخير يارب
ان شاء الله بتكون سنة 2010 احلى بكتير من سنة 2009
ان شاء الله بتتحقق فيها كل احلامك وامنياتك
وتكون سنة خير وسعادة عليكي وعلى كل اسرتك وحبايبك
كل الود
تسمحيلي اضحك بصوت عالي ... وانا متاكد انك هتتجاهلي التعليق كالعادة
مع انك تقريبا بتدوري عليه وسط التعليقات
مذكرتيش اهم احداث 2009 هل دا عن عمد ام محاولة اظهار انها احداث غير ذات اهميه ويمكن اسقاطها من العقل
ام انه محاولة هروب
عموما انتي دايما احلى موضوعاتك كانت موضوعات الميكروباظ
تحياتي
اشمعنى شعبان ماكانش فيه حاجة من شهور السنة
ما علينا
سيبك إنتي...الريدر في الراس مش في البلاص
كل سنة وانت طيبة ياميمايا
ويارب 2010 تكون أحلى والى جاى يكزن احلى
ميمى العسوله الاموره
كل لحظه وانتى بخير وسعاده
ويارب عام 2010 يكون كله هنا وسعاده وتحققى كل احلامك وتشوفى فيه كل الخير والهنا
انتى عن جد من اجمل الناس اللى تشرفنا بدخول المدونه عندهم
كل سنه وانتى مع كل الناس اللى بتحبيهم فى سعاده
معلش احنا عملنا كومنت قبل كده
بس المره دى تعليق اضافى
اسكندريه واهلها وشوراعها تتشرف بيكى يا ارق ميمي فى الدنيا كلها
زهراء
كل سنة وانتوا متجمعين إن شاء الله على الخير والطاعة وربنا يخليلنا كل حبايبنا حوالينا طول العمر
كل سنه وانتى طيبه ياجميله انتى:)
ويارب السنه الجديده تكون سعيده عليكى يارب.
ميمااااااااايا
ازيك ؟
طبعا بسم الله ماشاء الله يعني اللهم لا حسد
السنة معدية عليكي زي الفل
ان شاء الله 2010 تكون احسن و احسن علي الرغم من اصفارها اللي بتفكرنا بصفر المونديال بس يلا عادي مش مشكلة
تحياتي
السلام عليكم
عدت لأرى حصادك
كم هو جميل
والله شاعر بسعادة أن عامك به تفاؤل وخير وسعادة
بسم الله ما شاء الله .. احكي أكثر عنه .ز احكي عن رحلة أوروبا .. احكي عن دورة التنمية البشرية التي غيرت مفاهيم حياتك
أتمنى أن ينظر الجميع دائماً للإيجابيات بقدر نظرتهم للسلبيات فلكي ننهض علينا أن نفكر ونثق بأن كل مشاكلنا لن يستعصي عليها الحل مهما كانت
دمتِ بكل ود وسعادة وخير
بالمناسبة أنا تقريباً أو تدوينة قرأتها لك كانت تلك الخاصة بك وتوأمك
أنا أيضاً لي أخت توأم
ضيفى لاهم احداثك انى علقت هنا
هههههههههه
وكل سنة وانت بخير
والى الامام دائما
يا رب كل ايامك وسنينك ذكريات احلى واحلى.
وكل لحظة وكل يوم في السنة الجديدة وانت هنا وسطنا منورانا ومستمتعة بحياتك.. (';')
كل سنة وانتى طيبة ياقمر وان شاء الله السنة دى اجمل واجمل باذن الله
معلش قافلة المدونة علشان الامتحانات ان شاء الله بعد شهر 2 هفتحها
كل سنه وانتى طيبة يا ميمى ويارب السنه الجديدة تكون خير على العالم كله يارب
جميل جدا سردك لسنه 2009 ويارب دايما السنين اللى جايه تكون خير واجمل من اللى فات
ممممممم شكلها كانت سنة كويسة
يارب السنة الجاية تبقى احلى واحلى
:)
عابى نيو يير
كل سنه وانتي طيبه
ما في احلى من احنا ندرك
للايجابيات الموجوده بحياتنا
ونقدر قيمتها ونحمد الله عليها :)
كل سنة وانتي أجمل ميمايا
وأحن أخت وصديقة لكل المدونين
ميمى الحلوة اتوقعلك جدا جدا انك تنجزى اكتر جدا جدا جدا
لان اللى بيذكر ايجابيات حياته ومبيركزش قوى مع السلبيات ده بيعرف معنى الحمد والشكر علشان كده ربنا بيديله اكتر واكتر
روحى يا شيخه الله يديكى كمان وكمان
ههههههههه
من المؤكد بامر الله ان لسه خير كتير جاى باذن الله وكله بسبب اجتهادك ربنا يوفقك موااه
ياااااارب يسعدك ويفرح قلبك دايما
والايام الجايه تكون شيلالك كل
حاجه حلوة وكل سعاده ويوفقك
يارب يا احلى واجمل ميمايا
كل سنه وانتى طيبه
ميمايتي
الجمييييل
ياحبيب قلبي
اول ما ادخل هابعتلك ياقمر
بحبك والله والله بحبك
حقيقي يا ميمايا ربنا يسعدك انت مدونتك من اجمل المدونات اللي دخلتها وبحرص على متابعتها دايما
كل عام وانت بخير وسعادة واتمنى ان العام القادم يكون افضل وتحققي فيه كل آمالك
مع تحياتي
السلام عليكم
فى كل بوست بقراه بحس انك قد ايه عسوله ودمك خفيف
ربنا يديم عليكى النجاح والسعاده
كل سنه وانتى بخير وبصحه وسعاده وكل سنه تبقى احسن من اللى قبلها
دمتى بكل ود
happy new year
كل سنه وانتى طيبه يا اطيب قلب فى الدنيا
عام سعيد عليكى وعلينا وعلى الجميع ان شاء الله
جوجو
كل سنة وانتى طيبة يا ميمى
انتى وحشانى اوى اوى اوى
مش كنت عارفه انك موجودة مع يتوتة وسارة لو كنت اعرف كنت طلبت اكلمك لما اتصلت بستوتة
بجد كنت نفسي اوى اكلمك واسمع صوتك ونفسي اكتر اشوفك
يارب تكون سنة خير وسعادة عليكى يارب
كل سنة وانتي طيبة
يا اجمل ميمي في الدنيا
متعطيني ميم وحدة
اذا كنتم اخوة فتقاسموا الميمين
بهذر مجرد مداعبة معك اختي الوردة
كل سنه وانتى اطيب واجمل واسعد من السنه اللى فاتت
ويتحققلك فيها كل اللى تتمنيه من كل اللى تحبيهم
اللهم امين
ميمى
كل سنه وانتى طيبه..
يارب تكون 2010 اسعد واسعد
إرسال تعليق