الأحد، 24 يوليو 2011


والله العظيم اللى بيحصل دة حرام انا مش فاهمة بس هم رايحين بمصر على فين بتوع التحرير دول ما خلاص كل حاجة اتحققت ...مبارك بقى فى شرم الشيخ ....والعادلى وصفوت وسرور وكل الناس دول الفاسدين بقوا فى سجن طرة وان شاء الله يتحاكموا وعلنيا كمان بس هو ممكن ما نلاقيش لهم تهم لانهم كانوا بيسرقوا بالقانون بس دى مش مشكلتنا بقى !! وكمان الشرطة هتنزل بس لما توعدوها محدش يزعلها! ومش بس كدة يا جماعة دة كمان الاخوان بقوا الحمد لله صافى يا لبن حليب يا مرشد مع الداخلية والحكومة والمجلس العسكرى ..... انا اكيد بحلم ....هى دى مصر اللى كلنا حلمنا بيها يا جماعة ! ... حد يفهم بتوع التحرير ويقول لهم ارجعوا بقى ... لازم العجلة تمشى حتى لو مفيش اصلا عربية المهم العجلة تتدحرج !! انا بنزل الميدان على الساعة سبعة كدة فى الطراوة والاقيهم قاعدين وخيم ودرة مشوى ومنصات واغانى وحاجة فلة جدا انا عارفة انهم هيفتقدوا الاحساس دة وروح التحرير و كدة ... لكن مش معقول يعنى علشان هم يتبسطوا ويباتوا على الارض ويجوعوا ويعرقوا من الحر وكدة نقوم بقى نوقف حال المصيفين واللى عاوزين يشتروا ياميش رمضان او اللى عاوزين يتفرجوا على فيلم عربى بهدوء من غير فاصل اخبارى كدة او اشتباكات هناك- صح ولا اية؟ وبعدين ستة ابريل من حقها اكيد تزعل وتاخذ على خاطرها لان المجلس اتهمها بدون دليل بس فيه قانون فى البلد ينزلوا يرفعوا قضية على المجلس والقضاء يأخذ مجراه ويدينى ويديك طولة العمر انما بقى يعملوا مسيرة لوزارة الدفاع وكدة !! لا مينفعش برضوا لازم يكون فيه خط احمر - الجيش دة اخر عمود فى مصر- لازم تعرفوا كدة - ان مصر دى شقة اربع اوض وصالة والجيش دة العمود اللى اول ما تدخل من الباب على ايدك اليمين- ايوة حاااااااسب- اديك خبطت ! طب ليه كدة بس؟ ما احنا كويسين واهالى الشهداء كانوا قربوا ينسوا ....بتقلبوا عليهم المواجع ليه؟ وبعدين اية يعنى لما كام واحد يتحاكم عسكريا يا جماعة ؟ ماهو الجيش لازم يشوف شغله ويسترزق امال هيقعد فاضى يعنى لا محاكمات ولا فلوس هترجع ولا خطط ولا رؤية للبلد ولا اى حاجة طب الدول التانية تقول على جيشنا اية بس ! لازم يعمل منظر يا جماعة هيبة الجيش من هيبة مصر ولا انت مش مصرى هه انت ايوة انت مصرى ولا لا ؟؟ بجد بتوع التحرير انا بحبهم خالص وقلبى معاهم لكن هم كل شوية يغيروا كلامهم ويطلعوا بمطالب شكل مش معقول شوية اسقاط النظام وشوية اسقاط النائب العام طب حد يقول لى اية علاقة النظام بالنائب العام ؟ انا على فكرة طالبة جامعية ما تتريقش عليا؟ ولو اتريقت عليا تبقى بتتريق على التعليم الخاص فى مصر لان انا من جامعة اف واى ال ... احنا اللى بنجيب كل سنة عمرو دياب على فكرة فى الاوبننج بتاع الجامعة :) واية بقى موضوع العباسية دة؟ لا بجد كدة اوفر يعنى؟ انا لما شفت المنظر والله العظيم بكيت الجيش كان واقف يا حرام ورا السلوك الشائكة مرعوب يا اخوانا الطوب جاى من كل حتة الجيش ما اتعودش على الطوب والازاز الجيش بيتعامل مع مدافع وصواريخ ودبابات بس.... بجد ارحموه مش كدة ! واهل العباسية هيعملوا اية ناس نازلين يدافعون عن شرفهم وعرضهم لان المتظاهرين بيهددوا امنهم؟ المتظاهرين جايين من غير اى سلاح لكن معاهم يفط وبيقولوا هتافات بصوت عالى !! احنا فى اجازة من حق الناس دى تستريح!! وغير كدة اهالى العباسية عملوا اللى اى مواطن مصرى فى التمانين مليون هيعمله لو مكانهم دخلوا اوضة النوم فتحوا دلفة الدولاب اليمين طلعوا الشومة والمولوتوف وبعدين على المطبخ الدرج الوسطانى جابوا السيوف والسنج وبعدين على البلكونة جابوا جردل الطوب والازاز وعبروا عن نفسهم !! وكان فيه عند بعض الاسر شوية رصاص وقنابل مسيلة للدموع لزوم اعياد الميلاد والافراح وكدة انت عارف بقى المصريين واية حكاية امام مسجد النور الل كان بيعيط دة كمان وكان بيقول للجيش احموا المتظارين واضربوا ايد من جديد او حديد على البلطجية دة امام سيس صحيح وطبعا الجيش ملهوش فى العواطف دى ما عبرهوش وفضل بتوع التحرير يتربوا وكدة واصابات ودم ....يستاهلوا هم اية اللى خرجهم من التحرير ومن ايااااام انكل شفيق بنقول لهم اقعدوا وهنجيب لكم بونبونى طب عايزين اية تانى خدوا التحرير بس سيبوا المجلس فى حاله وبعدين انا عرفت ان فيه فى التحرير يا اما اهالى شهداء او ناس متضامنين معاهم ودول بجد لازم يروحوا لان انكل عصام قال انه بيعمل لهم صندوق فيه فلوس كتير وهيديهم ورغم اننا منهارين اقتصاديا لكن المجلس وانكل قلبهم حنين ومصر بلد مرزوقة دة احنا بنولع اعمدة النور طووول النهار واكيد بنطفيها بالليل.... ولا تسرفوا اما المجموعة التانية اللى فى الميدان فدول ولا عندهم بيوت ولا شغل ولا تعليم يعنى اجازة من كله طب والله لو طلعوا مارينا يومين هتفرق معاهم وهيرجعوا مبسوطين ويطلعوا مظاهرات تاييد للمجلس كمان ولو كان على السكن بجد مفيش اكتر من الكومباوندس فى مصر انا بجد بنصح بتوع التحرير من قلبى ...خلاص عملنا ثورة وهيصنا ....نرجع زى زمان بقى ملناش فى اى حاجة .... والمجلس لا يكل و لايمل من عقد صفقات هنا وسجن هنا وتخوين وتسخين هناك من اجل مستقبلنا من غير محاكمات و لا تقليب مواجع واعتبروا طنطاوى ابوكم.... دى اخر مرة هتكلم فى الموضوع بتاع التحرير واسكندرية والسويس والناس دول وعاوزة ارجع من المصيف الاقى الامور هادية وانا هتابعهم فى القناة الاولى واليوم السابع اصلى مش بثق غير فيهم.... وربنا يحفظ مصر مستقرة امنة ساكنة لا حس لها ولا خبر

هناك 11 تعليقًا:

شمس النهار يقول...

ياهلا ياهلا بالفللول

:))))

سافري واطمني هترجعي هتلاقي الوضع علي ماهو عليه وعلي المتضرر اللجوء للأمم المتحدة
او الجامعة العربية

غير معرف يقول...

على فكرة انا بكرة النكسة دى جدا ومع كل اجراء كان ومزال الجيش ماخدوهوش واتمنى الجيش ياخده لان فعلا خربوها ولسه هيخربوها وفعلا متاكد ان القلوب هى الى بقت عمياء مش الاعين كمان وشعب بقى قلل الادب وبيعانى من سواء سلوك اتمنى كل واحد كان واخد اتجاه النكسة زى ما شوفت كدا اخطاء مبارك ونظامة دور قى والبس نضارة تشوف باتجاهين وشوف الاتجاه التانى ادخل على منظمة الصحة العالمية وشوف ترتيب مصر الكام فى السرطان هتلاقونا مش مصنفين من الدول الخمسين الاوائل فه اصلا
شوفوا لية الجزيرة اظهرت ثروة بالقدر دا ولية ترجعت بعده واتهمت انه خاصة بالنظام ككل ولية رجعت واعتزرات وقالت انها مش تبع مصر لاء تبع ليبا ولية اعتزرات وقالت انها وثيقة بنك باركليز مزورة وان الجارديان اكتشفات تزورها وغيره وغيره وغيرة دوروا على حقيقة شهداء اغلبهم بطلجى وحرامى وبعدين هل الشهيد اللى يقتل مصرى بيأدى واجبة ولا اللى كان يسهر فى سبل الله شوفوا اقباط المهجر واللى بيعملوها شوفوا فيديوهات بوارج امريكا الواقفة على شواطئ الاسماعلية وبورسعد فوقوا بقى بدنا بقت اسواء وربنا يحفاظها من الانقسام

غير معرف يقول...

s.m

Timo.. يقول...

ياااااااااه يا ميمايا..
مش عارف اقول غير: (لك الله يا مصر)
بجد وحشتني كتاباتك وبلاش الغيبة الطويييييلة قوووي دي..!!

Tarkieb يقول...

هههههههه الاول قلت فلول وكانت مرة في صربيا طلعت فلافل ههههه....والله عندك حق مفيش امل وشكل العيب بينه مننا...مش وش حرية ....اخدها العسكر وطار

د. ياسر عمر عبد الفتاح يقول...

كل عام وحضرتك بخير ,,
ربنا يتقبل منا صالح الأعمال
ويقوينا على الصيام

أبو أمك يقول...

عود أحمد
بس هو خطك صغر كده ليه ؟ مفيش معاكي فلوس تجيبي خط أكبر شوية ؟

مامة مازن يقول...

ميماااااااااية
يا هلا يا عسولتى

لا تمام كله فله صيفى انتى ومتقلقيش تعالى على يوم 15 كده علشان نتابع محاكمة جدو سوا


معلش الغير معرف مش فاهمة منه حاجة خالص

blue-wave يقول...

كل اللى احنا فيه دا بسبب تخوين الاخر

مصعب صلاح يقول...

السلام عليكم ..
ازيكم ياجماعة .. التدوين واحشني جدا
انا عموما دخلت الجامعة الامريكية وبدرس فيها إعلام
دمتم

عبده العمراوى يقول...

شركة مكافحة حشرات بالدمام