الجمعة، 3 أبريل 2009

الميكروباص


كل يوم بركب الميكروباص وأنا رايحة الشغل أو وأنا رايحة الجامعة ... ومش عارفة ليه ببقي مبسوطة أوي لما بركب المواصلة دي بالذات ،،وسألت نفسي ايه سبب الانبساط ده؟


يمكن علشان ببقي راكبة مع عفريت من عفاريت الأسفلت؟


يمكن علشان العفريت ده عارف طريقه كويس وأجرته موحدة مش زي سواقين التاكسي


[ أفتكرت نكته : واحد وقف تاكسي وقال للسواق لو سمحت توديني فين وتاخد كام؟ رد عليه السواق وقاللــه خليك مكانك وهات اللي تجيبه]...!! وعلي فكرة دي سياسة كتير أوي من سواقين التاكسي،،


ويمكن كمان علشان لو ربنا سهل الحال ولقيت مكان جنب الشباك........ ياه ولا كأنك راكب مرسيدس


بالظبط مش هعرف أحدد سبب وجيه لحبي للميكروباص


بس كل يوم فيه حكاية جديدة بسمعها وبشوفها في الميكروباص ،، وخاصة لو المشوار طويل شوية ،، مش طويل في مسافته لأ طويل في زمنه .. يعني مشوار ياخد نص ساعة من ميدان لبنان للتحرير تلاقيه وقت الزروة يادوب ياخد ساعتين ويااااااه بقي لو حدي VIP معدي ..... تبقي هيصة ..


يعني هتقروا حكايات بتحصل قدامي من الواقع اللي ممكن حد يحسبه خيال


انتظروني في " الميكروباص الجاي"





هناك 16 تعليقًا:

mimi يقول...

marwan
أخيرا لقيت حد بيحب الميكروباص زيي !!!
عندك حق والله أنا كمان بركب الميكروباص وأعيش
بس تعالي هنا انا مش لاقيالك مدونة ليه؟
رد عليا

MǿиY El-Shreef يقول...

ههههههههه

في حد يحب الميكروباص يابنتي

الله مايعودها ايام الشحططه ف الميكروباصات

ياسلام ع المعاناه عشان تعرف تركبي ولا تدخلي جوهلو من قدام مليان

حاجه تنقط

مستنيه الحكايه

موني

عبد من عباد الله يقول...

وعاتبه عاتبه .. ميدان التحرير

فيه مكان ورا يا انسه

انت يا استاذ خش كده شويه الكنبه بتشيل خمسه

ادخلي يا ابله فيه مكان بإذن الله

استعنا على الشقا بالله ...

شيال الهـموم يا صـغــير
شيال الهـموم يا صـغــير

مسدس صغير يقول...

الميكروباص ده علامة من علامات تاريخ مصر الحديث.
ممكن اللى هيدونو التاريخ الجديد ييجو يركبو الميكروباص وهما يعرفو تاريخ مصر.
اللى بيغنى واللى بيتكلم فى السياسة واللى بيتكلم فى الدين . وحاجات تانية كتير هقولهالكو فى الميكروباص الجاى..
هههههههههه
احييكى على الميكروباص. اقصد على البوست

mimi يقول...

مروان
موني
عبد من عباد الله
المسدس النونو

نورتو الميكروباص بتاعي
أأأأقصد البوست بتعليقاتكم

القمر الساهر يقول...

ان بقى مش بحبه خالص

خاصةعد حادثة شهيرة حصلت عندنا وراح طلبة جامعة فيها ربنا يرحمهم

بس توبيك دمه خفيف متابعة معاكى ان شاء الله

Nostor Azzuro يقول...

حكاية كويسة عشان تكتبى فيها

وانا مستنى القصة بتاعتك

موناليزا يقول...

ونحن فى الانتظار

تامر حسين يقول...

ياااااااه فكرتيني بايام زمان والله انا ولله الحمد مبقتش بركب مكروباصات غير في المواسم
وبالمناسبه حصلي موقف جه علي دماغي وانا بكتبلك التعليق
في احدي صراعاتي في الوصول الي احدي المكروباصات للحصول علي مكان مناسب جنب الشباك ويكون مكيف وفيه عفشه ميه
طبعا بعد مخدتلي كام كتف علي كام زقه من الي قلبك يحبهم وقفت في الشارع وبعلو صوتي وقلولتهم اييييييييييه في ايه يا جماعه هو المكروباص ده بيعدي عالجنه
والي الي هيركبه هيموت نت غير ميتحاسب
لقيت الناس بصولي وواحد الله يكرمه لو بيقرا التعليق ده دلوقتي قالي تعالي يا كابتن انا حجزتلك مكان
وتوته توته فرغت الحدوته وحشه ولا ملتوته ههههههه
اكيد حلوه صح صح صح
تحياتي
معلش تقلت عليكي

mimi يقول...

موني الشريف
====================
اسفة علي تأخيري في الرد علي التعليق

بس أنا بحب الميكروباص اوي ...

ده صندوق الدنيا علي رأي عبد من عباد الله

mimi يقول...

عبد من عباد الله
=======================

ايوة بالظبط كده أنت فاهمني ... وشكلك ميكروباصاتي قديم ...

تابع كتاباتي وقوللي رأيك علشان رأيك يهمني

تسلم

mimi يقول...

مسدس صغير
===========
ابو صلاح عندك حق
ومستنياك في الميكروباص الجاي
تطلق فيه طلقات من مسدسك الصغير

mimi يقول...

القمر الساهر
====================
معلش بس الحوادث بتحصل في كل أنواع المواصلات ولو حتي السيارات الملاكي .. لا أوعي تتعقدي ...

بس انتي مش متابعة خالص

mimi يقول...

نوستور ازوررو
===================

ايوة برافو عليك فهمتني ...
ممكن حاجة تحصلي في حياتي ببقي عاوزة أفهمها لغيري ومش لاقية كبسولة أركب فيها موضوعي علشان يكون سهل الهضم ...
الميكروباص ده بقي الفكرة اللي من خلالها هعرض كل موضوعاتي ان شاء الله

شكرا وتحياتي لمرورك

mimi يقول...

موناليزا

==============

روفي وجنة وموناليزا

في انتظاركم وعاملة حسابكم في الكنبة اللي ورا ... حاجة خصوصي كده

mimi يقول...

تامر حسين
===============
والله دمك خفيف ... والحكاية دي بتحصل مش كل يوم ... لأ كل خمس دقايق في اليوم

نورت المدونة وشكرا لتعليقاتك