السبت، 25 يوليو، 2009

رومانيا رايح جاي (( الجزء الثاني))


أهلا ومرحبا بكم علي متن مدونتي MIMAYA واللي كنت بفكر أغير أسمها الي MAMAIA
نسبة لأجمل منطقة في رومانيا ... لكن مهنش عليا أغير أسمها ... وهتفضل مدونتي ميمايا علي أسمي
وحشتوني جدا جدا ... وعدتكم بإني هحكيلكم عن الرحلة لرونانيا بالتفصيل ... وعلشان خاطر الحبايب ... بالصور كمان ...
إن شا الله ما حد حوّش..

الصورة دي صورة الطيارة اللي ركبناها وإحنا في مطار القاهرة القديم ... علي طيران تاروم
وكانت الساعة 3.30 فجرا .. وكان الجو تحفة وروعة ... وكنت بحاول أستمتع بكل لحظة تعدي عليا ... كان معايا أصدقاء كتير بيتريقوا عليا علشان بصوّر عمال علي بطال ... ودلوقتي بيتحايلوا عليا ابعتلهم الصور ... إيه رأيكم ابعتهالهم؟ ولا أبقي شريرة كالعادة ؟
انتوا اللي هتقولوا ...

الصورة دي صورة واجهة مطعم علي البحر الأسود ...
الورد ده طبيعي 100% .. وبيتغير كل يوم ، وريحة المكان كله عطور وورد الصورة دي في كونستانسا مش في بوخاريست


الصورة دي صورتها وكنا في الاتوبيس في بوخاريست ، وكان فيه تجمع سيارات وناس كتير ولما سألنا قالولنا إن ده سباق سيارات ومقام أمام قصر تشاوسيسكو رئيس رومانيا الأسبق، والمبني ده 1000 متر فوق الأرض و 1000 متر تحت الأرض


ديانة الرومانيين أساسا المسيحية ، والكنائس مبنية بصورة معمارية تنم عن ذوق عالي ورفيع المستوي ، وممكن مش تعرف تفرق إن كان ده مسجد أو كنيسة إلا إذا شفت الهلال فوق المدني أو الصليب ... ودي صورة للمسجد من الداخل ونسبة المسلمين في رومانيا نسبة كبيرة علشان الأتراك اللي عايشين هناك






صورة أخري من زاوية مختلفة للمسجد ... المسجد ده موجود في كونستانسا




ده جسر يمر من فوق نهر الدانوب ، وهذه المنطقة تسمي دلتا الدانوب ، المنظر من فوق رائع بجد




لما رحنا بوخاريست ، كان يوم أحد يعني كان يوم عطلة ، وشفت عروسة وعريس بيتصوروا أمام مبني ... قلت يمكن كنيسة كبيرة أو كاتدرائية أو حتي مزار عام ... الفرح كان الساعة 4 عصرا ،، يعني مش بالليل زي عندنا ،، وكانت العروسة فرحانة أوي بالناس اللي من كوكب تاني اللي هما إحنا لما حبينا نتصور معاهم ... وفرحت أكتر لما عرفت إننا فراعنة .... أأأأأأأقصد مصريين يعني ..
طلع المبني ده إيه ؟
طلع المبني ده متحف المدينة وعندهم عادات يتصوروا كده قدامه وعلي السلالم بتاعته ... زي كوبري اكتوبر كده في القاهرة

كان نفسي اروح ازور قصر دراكيولا ... بس المسافة بعيدة جدا عن أماكن تواجدنا .. زي من القاهرة لأسوان كده ،، بس جبت صورته ،، وطبعا الحاجات هناك غالية جداااااااااااااااااا يعني عمار يا مصر




الصورة دي في بوخاريست ،، لمبني وزارة العدل الرومانية ،، شايفين الشوارع .... مرايات
الناس اللي في الصورة دول معرفهمش علي فكرة !!!



ده بقي أقدم بنك في رومانيا وموجود في بوخاريست ، شكله جميل جدا وتحفة معمارية


الصورة دي في وسط المدينة ،، في كل كام متر هتلاقي ساعة وهتلاقي مؤشر درجات الحرارة وإشارة مرور والغرامة فورية للي يكسر الإشارة أو يعدي الشارع في غير الأماكن المخصصة للعبور ... نظام بقي نقول إيه؟ حسرة علينا


كارفور ... أتاريه سلسلة عالمية في رومانيا وبلغاريا ومصر وكام دولة تانية ... صرح تجاري هايل ،،


الصورة دي صورة لشاطئ في مدينة أسمها مانجاليا ،، بين بوخارسيت وكونستانسا ...
الشاطئ ده مجاني ،، بتدفع بس تمن الكرسي والشمسية ... تخيلوا ده المجاني ؟ اللي بفلوس بقي شكله إزاي ؟؟؟؟؟
منجاليا وصورة للبحر الأسود عن قرب ... منظر مريح جدا للأعصاب

دي بقي كابينة التليفريك ... مش وسيلة أنتقال هناك ،، لأ ... دي وسيلة للفسحة التذكرة الواحد ب 22 يورو ولمدة 10 دقايق بس !!
بس بترتفع ارتفاع جبار .... وتشوف البحر والناس كأنهم ألوان مرسومة علي ورقة ... الباب ده بيتقفل اوتوماتيك لما حد يركب فيه ،، والكابينة الواحدة حمولة 4 أشخاص ... وفيه فتحات للتهوية ... ولو النور قطع كل سنة وأنت حضرتك طيب ...
السيسي ... حصان صغير في منطقة الملاهي بيأجره الأطفال لمدة عشر دقايق يتمشي بيهم شوية ، وممكن يتصور كمان ( كل حاجة بأستئذان ... يعني اللي بعمله ده غلط ... )

بائع البالونات ... علي شكل مهرج ... وبيتكلم كتير والناس بتضحك ... بيقول إيه ... ولا انا عارفة


المنظر ده من بلكونتي ... الجمال هناك 24 ساعة في اليوم ... يعني عرض متواصل ليلا مساءا
ده شاطئ البحر الأسود اللي أسمه (مامايا ) في كونستانسا
وعلشان محدش يمشي في الرمل ،، معمولة علي الارض مشايات من الخشب

دي صورة من المطعم في الفندق ... الفطار والغدا في مكان ... تشوف فيه زرع وخضرة مع كل قطمة ...
ده غير ان أكلهم صحي
وهواهم صحي ...
الحمد لله علي كل شئ
عااااااااااااااااااااااااااااااا


الصورة دي صورة ماريا صديقتي ... اللي أسمها ميمي برده ... ودي خطيبة ((عادل)) صاحب مدونة البلد دي فيها حكومة وهوا خطبها مني ... ووعدته بنشر صورتها ... دي عربيتها الخاصة يا عادل وبتقوللك مش عاوزة بس غير رضاك عنها



كوستا كافيه ... أول ما شفته حسيت بحنين لمصر ،، والجامعة الأمريكية وأيامها ،،
ويااااااااااه
العيال أصحابي اللي مدمنين الموكا والشيكولاته البيضا السخنة ...
ومن هذا الكافيه أرسل سلامي الي شارع جامعة الدول العربية ... ,وأقوللـه ... تحيا مصر
ورومانيا كمان
اعلان عن مطعم بيتزا ... والتمساح ماسك قائمة طعام مكتوب عليها (( بالهنا والشفا )) بكل اللغات ... مفيهمش عربي ... عاااااااااا


ده بقي الأتوبيس ... وسيلة المواصلات العادية هناك ... علشان مفيش كثافة سكانية ... مفيش كثافة علي أي حاجة
متسمعش أصلا صوت كلاكس عربية ... ولا صوت حد بيزعق ... ولا صوت حاجة خالص
هوششششششششششششششششش هدووووووووووء

في بوخاريست زرنا كافيه ... صاحبه مصري الجنسية .. عايش هناك ... الكافيه بيقدم مأكولات مصرية ورومانية ... وشيشة ومشروبات مصرية ...


الشوارع نضيفة ... والهواء نقي ... والحياة بجد بيس يا مان





الجو ساعات سقعة وساعات حر وساعات مطرة ... بس في كل الأحوال ...
أنت في أوروبا يا جميل


أيام الشغل شغل ... وأيام الأجازات أجازات بجد
كل يوم جمعة باليل والسبت طول اليوم والأاحد طول اليوم ... ديسكوهات في الشوارع ومسابقات وأغاني وحفلات شواء في الهواء المفتوح
وعروض ترفيهية ... ومهرجانات .... استمتاع بكل الوسائل ... دي بنت في جزء من عرض في "مامايا"

التليفريك ... من بعيد جدااااااااااااااااا
قائمة طعام المطعم المصري ... يوجد عنده وجبات بأسماء المدن
وجبة كايرو
وجبة اليكس
وجبة كوم أمبو
وجبة الأقصر






شاطئ الأسترخاء في "مامايا" كونستانسا

ماكدونالدز ... حبيب قلبي ... في أكبر مول تجاري فيكي يا رومانيا ....

سفينة كبيرة ضخمة في أول كونستانسا ... علشان ترحب بالزائرين وتعرفهم إن هنا (CONSTANSA)
[ ملحوظة : بتتكتب بالروماني كونستانتا وبنقراها كونستانسا ]

بدون تعليق ....... حاجة كده من غير كلام ...


تاكسي رومانيا .... تاكسي العاصمة
أنا كده خلصت الجزء التاني
الجزء التالت هكتب فيه عن مواقف حصلتلي ..
ويارب الموضوع يعجبكم
ومش تنسوا تباركوا لعادل
ألف ألف يورو
قصدي ألف ألف مبروك يا دولا
.
.

هناك 54 تعليقًا:

adel يقول...

اول تحليق

هاقرا و اجي

فوووووووووووو

adel يقول...

هههههههههههههه
بجد صور تحفة موت

و كارفور سلسلة فرنساوي علي ما اعتقد و ليها فروع كتير و كوستا كذلك :):)

وماريا بعتت صورتها اخيرا
يارب توافق عليا بقي :):):):)


اهم حاجة انك انبسطي و بجد بوست حلو قوي

و اسمي مكتوب اهو
حتي لو مع ماريا :):):)

adel يقول...

اخيرا عرفت الق تعليقات هنا
والاولي و من غير ما حد يجي :):)


ميمي ياميمي يا ميمي

وردة يقول...

ايه يا بنتي الجمال
ماشاء الله
ربنا يكرمك
وان شاء الله تزوريها تاني قريب
ههههههههه
يارب
ابقي خدينا معاكي
سلام

هندسة وصفية يقول...

انا عاوز اخطب التلفريك
كسيب و ساعته بالشيء الفلاني
و هتنغنغ

Mo7ammed يقول...

ايه الحلاوة دى
فكرتينى بفيلم الطريق الى ايلات

"ياريتنى كنت معاهم "

انما فين المضيفات والناس الحلوة دى ^_^

دعاء مواجهات يقول...

البلد جميلة اوى وانتى اجمل بكتير اسلوبك وتصويرك وحكاياتك ممتعه جدا

انا كنت قولتلك قبل كدة انى انا كمان فى شبرا بس انتى مردتيش لما ترجعى ياريت نتفق ونشوفك

بيس ياقمر

شريكة في المطعم يقول...

الصور حلوة اوي اوي
البلد جميلة اوي خصوصا التلفريك والبنك ..
واحلى صور وهي مغيمة والشتاء ..
والكارفور طبعا سلسلة عالمية وموجود
في دول الخليج قبل مصر ...
بس احلى حاجة طبعا في البوست
انك الي مصورة الصور دي..
ومستنيين الجزء التالت...

Love Is Life يقول...

رووووعة بجد ...
صور روعة وتعليق أحلى ...
أنا نفسي أزور رومانيا ...
لأني حبيتها من فيلم Blood and Chocolate ,,,
عالعموم أتمنى نبقى أصحاب ...

كاتب مصري يقول...

السلام عليكم
تحية طيبة
الزيارة دي مش خاصة قوي متأسف لو مش بتحبي الإعلان جوة التعليقات بس ده أمر مهم وخاص جدا
دي دعوة لمتابعة الإقتتاح الجديد لمجلة رؤية مصرية يوم السبت 1/8/2009
roaua.com
هتنور المجلة بوجودك
محتاج رأيك ومشاركتك معانا ولو عاوزة تنضميلنا تعالي يلا معانا
مستنيكي
خالص تحياتي

قلب ارهقته الاحلام يقول...

ايه ده ؟؟ عااااااااااااا

انا فاتني كل ده ؟؟:((

انا جايه بسلم اسلم عليكي واقولك وحشتينيييي

وهرجع تاني ياميمتي

بجد وحشانييي جدا ووحشني الكلام معاكي

يارب تكوني بألف خيررر دايما

هندسة وصفية يقول...

السيسي في التلفريك
مش عارف
بكرة يبان
بس شغال

maiosha يقول...

الصور جميييييييلة

وبجد البلد شكلها جميلة اوى

ان شاء الله تستمتعى هناك

وترجعى بالسلامة

مامة مازن يقول...

اعيط بقى واللا ايه عاااااااااااا
ايه النضافة والجمال والهدوء اللى حست بيه من الصور ده
اييه ده كله اييييه ده كله
ههههههههههههههه
كويس انك رجعتى برضه ما انتى ممكن كنتى تطفشى هناك برضه احنا نشكر وطنيتك برضه ههههههههههه
واللا حكاية المشايات اللى على الشط دى اما حكايه
على كده لو واحد رومانى جه يتفسح هنا هيجيله كبت يعنى هتبقى نقيض بلده فى كل حاجة تلوث سمعى وبصرى وتلوث بيئى وبلاوى سوده
بس برضه المصرى هيفضل مصرى النيل رواه والخير جواه
ثوانى هروح اكمل عياط بقى عااااااااااااااا

د. ياسر عمر عبد الفتاح يقول...

شكلها بلد جميلة أوي
كنت فاكرها بلد علي قدها كده ..!!
دي تحفة بجد

بس عندهم كارفور ...!!
لو دورتي كويس كنتي لقيتي الشبراوي
بس يا تري ساندوتش الفول هيعمل كام يورو؟

yoyo يقول...

مسائك وصباحك سكر
وحشتنى جدا جدا والله
و يارب تكونى استمتعتى و استفدتى بالرحلة دى
انا بس قولت اجى اسلم
لكنك وحشتنى اوى يا قمر
ليا عودة ان شاء الله
تحياتى
يويو

المعتصم يقول...

حمدالله على السلامه
صحيح متأخرة شويه انما الظروف بقى معلش
سماااااااااااح
البلد دى طلعت حلوة قوى
بقولك ايه
اوعى تدى الصور للعيال اصحابك
انا بقولك اهه
مش هما كانو بيتريقوا عليكى يبقى خلاص بقى يتحملوا نتيجة فعلتهم الشنعاء دى
(جاى اهدى النفوس انا)
ههههههههههههههه
صحيح هتقدرى تيجى لقاء المدونين يوم السبت الجاى ولا ايه ظروفك ؟؟؟
تقبلى مرورى وتحياتى
ســــــــــــلام

مصعب صلاح يقول...

السلام عليكم
مبروك عليكي زيارتك لرومانيا أنا كمان كنت هسافر بلغاريا بس مفيش نصيب

---
على فكرة أنا لسه في تانية ثانوي السنة دي
يعني لا كلية ولا يحزنون

عبد من عباد الله يقول...

لا لا بس سيبك برده ، السيده زينب برقبتهم ، يعني اديكي رحتي و شوفتي ، لقيتي حته زي العتبه ، اكيد لأ ...

نحن نختلف عن الاخرين ، و بعدين مفيش الفه كده بين الشعب ، تحسي انك عايشه في فيلم هادي كده ، لكن فين تلاحم الشعب اللي عندنا ، تلاحم الناس مع العربيات مع الحيوانات ، يعني بزمتك شفتي الحمار الكرو هناك ؟؟

اهو من احدى معالم مصر الحبيبه ..... اه لو نحس بس بالنعمه اللي عندنا ههههههههههههههههه


الف سلامه للمرة التانيه و رحلات سعيده اخرى ان شاء الله

أحمد عاطف يقول...

ميمي

وربنا انا اتنقطت

ناس لها رومانيا وناس لها السودان

انا بقى هاصور السودان حته حته عشان استدر عطف الناس

حمد الله على السلامه يا اجدع ميمي في موقف عبود والمؤسسه وكل مواقف الميكروباصات

حلـم،، يقول...

يت اطمن واترك السلام في بيت المودة


واسجل شهادة

بكلمتين


انتي الود


اشكر مرورك نورتيني

اتمنى ان يستمر هذا النور

فشكووول يقول...

تعليق صغير على الجزء الاول من البوست
لا خليك شريره كالعاده

المعلم محمد صاحب المطعم - طعمية سخنة يقول...

سلامو عليكم
ce ma fa ci
و لو اني زعلان منك و بعدي من غير ما اعلق و قاري الموضوع من اول ما نزل

الا اني جيت اهو اعلق و افكرك بالعروسة
انتي جبتي عروسة لعادل و انا لأ

انا عاوز عروسة اصغر منها بشوية صغيرين يعني 50 سنة بس

عاااااااااااااااااااااااااااااااا اهو
مليش دعوة انا مكلمك عليها مرتين و انتي مردتيش

فشكووول يقول...

العزيزه ميمايه

شفت يا ميمايه الدنيا شكلها ايه بره
الناس عايشه والشوارع نضيفه وكل حاجه على سنجة عشره ودايما الدنيا ربيع والجو بديع سلمى بقى على الترماى
هناك يا ميمايه الناس لها قيمه مش زى جماعه اصحابنا الناس ما لهاش اى قيمه وكل حاجه بتتعمل عشان ترضى الناس وتخليهم مفرفشين كدا ومزقططين

على فكره انا عايز اخطب الست الحلوه اللى سايقه العربيه والطشها من عادل عشان العربيه بتاعتها حلوه قوى

والشواطء الله على الشواطئ ما فيش احلى من كدا مش زى شواطئ الاسكندريه اللى الواحد يدفع دم قلبه عشان يعرف يقعد على البحر .... بيستعبطونا

كان نفسى اطلع اى جنسيه اوربيه عشان هناك الناس لها قيمه ولها معنى مش زى جماعه اصحابنا ... ما تقولش ايه ادتنا مصر قول حندى ايه لمصر لحد ما روحنا تطلع من جتتنا

تحياتى ميمايه

اقصوصه يقول...

الله

الصور روعه

وايد حلوه

بس يا ترى ما في ششي ثاني بعد

حلو هناك؟

المعلم محمد صاحب المطعم - طعمية سخنة يقول...

هيييييييييييه
عروستي اللي في الشو اللي في مامايا ؟
بالمناسبة هي هتدفعلي مهر كام؟

عاشقة الأحزان يقول...

عااااااااااااااااااااااااااااااا

عاااااااااااااااااااااااااااااااااا

مكسوووووووووووووووووووووووفه جيت وخرى عاااااااااااااااااااااا

ليه كده بس

عاشقة الأحزان يقول...

بس انا بنهيألى انه مافيش حد علق غيرى صح


انا وبس

هههههههههههههههههههههههههههههه

ياخبر
انا اول تعليق يا رداله

ههههههههههههههههههههههههههه

عاشقة الأحزان يقول...

بما انى اول تعليق بس من تحت

عااااااااااااااااااااااااااااا

عاااااااااااااااااااااااا

العب شويه عبال ماحد يدخل هى الناس مش عارفه انك نزلتى بوست ولا ايه

عااااااااااااااااااااااااا

عاشقة الأحزان يقول...

فينك يا احمد

التعليقده

عشان خاطر اسماء واحلام فى وجدانى

بس هموت واعرف ازاى اسماء والبت احلام الاتنين فى وجدانك يا احمد
هق هق هق

الموضوع كبيررررررررررررررررر

هع هع هع هع هع هع هع

عاشقة الأحزان يقول...

التعليق ده بقا عشان خاطر الرعد الزئبقى

انت فين ياثندر

وحشتنا يامااااااااااااااان


ام فاروق بتسلم عليك

هههههههههههههههههههههههههههههه


وانشراح وعدلات

هههههههههههههههههههههه

وكمان ام ناجى

لولولولولولولولوىىىىىى

عاشقة الأحزان يقول...

اظهر بقا يارعد يا زئبقى ياكيدهم

هاهاهاهاهاها


الرعد الزئبقى


هع هع هع

ثندررررررررر


ثندرررررررر

ثندرررررررررر

طبعا لسه قدامك فرصه تدخل وتعلق

ههههههههههههههههههههه

عاشقة الأحزان يقول...

جميل قووى يا ميمايا

الله عليكى الصور تحفه


مبروك ياعادل


عاااااااااااااااااااااااااااااااا

أم مالك يقول...

اهلا ياميمى
ايه يابنتى الجمال ده
اكيد استمتعتى ده احنا استمتعنا
واحنا بنتفرج على الصور فما بالك
باللى شاف على الطبيعة
ربنا يسعد ايامك ويكرمك
تحياتى

بدراوى يقول...

هو البوست ده نزل امتى
؟!
مشوفتوش فى التحديث
!!!!

فيه حاجة فى اى بوست
تحت
اسمها
post options
ممكن تعدلى منها تاريخ نشر البوست براحتك

حبقى اقراه و اعلق

بدراوى يقول...

بوست جميل اوووى
يارب تكونى انبسطتى هناك

بس عروسة عادل قمر بجد
يا بختك يا عادل
ههههههههه
:-)

Meme يقول...

الله الله عالليموزينات!! هو مش جمع الليموزين كده برضو؟
لا و كمان ميمي شكلنا حنبقى اصحاب ...ممكن؟

جارة القمر يقول...

الله عالجمال ياميماية

بجد كتير حلوين الصور

خدي بالك كدة حتتحسدي ياميمي

عفكرة كان ممكن اجي اشيلك الشنطة

وأعملك قهوة الصبح بس كنت خدتيني :(

عفكرة بلادنا ممكن تكون احلى من كدة

بس ماتعرفيش الخلل فينا ولا بمين

وحشتييييييييييييييييييني

thunder يقول...

عااااااااااااااااااااا
نحيط سيادتكم علما بان الرحلة الى رومانيا تم الغائها بسبب الاحوال الجوية وعلى السادة المستمعين مرعاة فروق التوقيت وعاااااااااااااااا
لية بقى تم الغاء الرحلة بجد لانها احنا بلد فوضوية واللى انتى عرضتية رغم ان رومانيا من الدول اللى شوية تعبانة اوربيا يعنى واقتصادها مش قوى اوى الا انها فعلا اية من ايات الجمال والسلوك مش عد اللامبالاة اللى احنا بنعيشة عامل ع بطال
والله يابنتى هقر عليكى بسبب الرحلة دا
لانك متعتى نظرى بنضافة مش متعودين عليها ويخوفى يابدران ترجعى تقولنا فى اروبا والدول المتقدمة عااااااااااااااا
اختى العزيزة انتى وحشانى اكتر والله ومش عارف انتى مختفية اوى كدا لية يارب يكون خير
ان شاء الله
دمتِ يارب بكل حب و ود وفى رعاية وحفظ الله دائما ملاحظة فى التالت بقى صور صحبتك تنزل فاكره عاااااااااااااا

سمكه واحده يقول...

انتي عسل اوي
ربنا يخليكي
الله يسلمك ياقمر كفايه سؤالك عني
ده بيسعدني كتيييييييير
ربنا يوفقك يارب
انا اخويا عمال يرخم عليا وعاوزه ارغي هجيلك وقت تاني ارغي كتير لحد ما تقولي يخربيت معرفتك ياسمكه
اصل بموت في الرغي والواد عمال بيشدني
اقوم بكرمتي احسن بدل ما اتسحل اشوفه عاوز ايه
تحياتي ياقمر

اسماء واحلام فى وجدانى يقول...

ازيك يا ميمى
عاملة ايه ومش باينة ليه
ازيك يا محتلة
يا زعيمة الاحتلال
فى كل مجال
اروح منك فين
منك لشكرى

حياتى نغم يقول...

السلام عليكم / حمدا لله على سلامتك يا جميل وعقبال ما تتكرر أوقاتك الحلوه .
صور تحفه وجميله جداً أنا كمان رحت رحلة عمره من سنه وكنت بصور كتير لدرجة وصلو فوق ال300 صوره وعملت لها تدوينات بعنوان رحلة العمر .

انت تسال والكمبيوتر يجيب يقول...

ندعوك للأشتراك فى برنامجنا الأذاعى من الأذاعه الرئيسيه لمصر اى أذاعة البرنامج العام ويذاع يومياالتاسعه وعشر دقائق صباحا عدا الجمعه.

التفاصيل فى
المدونه
http://netonradio.blogspot.com
الموقع
http://return.to/cairo

تحاتنا وامنياتنا لك بالتوفيق

بــــ الخطاب ــن يقول...

ايه الجمال ده انتى خليتى الواحد يتمنى يروح هناك بجد الهدوووووووووء ما فيش أحلى منه موضوع جميل وهستنى الجزء الثالث
وفى النهايه أحب أبارك لعادل ألف ألف مبروك يادولا كنت هابدأبيك بس قلت تبقى مسك الختام

سمكه واحده يقول...

جيت بعد ما قريت البوست اهو
ماشاء الله تحفه اوي والصور وكل حاجه
واكتر حاجه الورد وانه ليه ريحه مستمره انا بعشق الورود اوي
وان الفرح بيبقي بالنهار والعروسه اموره واللي عجبني اكتر انها فرحت بالفرعنه(وش بيغمز)
تعرفي ان امنيه حياتي السفر والترحال
عارفه الرحاله من بلد لبد ويكتشفوا كل جديد انا بعشق السفر والنتطيط
اووووووووي اهم من اي حاجه بحب اوي اسافر نفسي اسافر بلاد كتير والف الدنيا
تفتكري يا ميمي!!!
بجد رحله حلوه والف حمدالله علي سلمتك وديما مبسوطه وسعيده
سلام ياجميله
وطمطم او سمكه هما نفس الشخص(وش مبتسم)
اصلي كنت بحب بوجي وطمطم وانا صغيره مووووت
تحياتي

بنجاواتى يقول...

ميمايا:

عرفت انا دلوقت ليه ما بتحبيش السمك والفسيخ وبتحبى المكرونة... رومانيا غيرتك اوى ههههههههه

عايز بس اقولك ان الصور دى ما تديهاش لحد هما هياخدوها من ع البوست غصم واتدار ههههه

البنك التحفة ده بقى عايزين نسرقه على طريقة غبى منه فيه...تفتكرى هننجح؟؟؟

ما شاء الله خطيبة عادل دى قمر قمر قمر ...بس مش شايفة انها صغيرة شوية؟؟؟

حلوة البلد دى
بيركبولها منين دى علشان عايز اروح زيارة ع السريع كده وارجع فى نفس اليوم؟؟؟

سلام

thunder يقول...

كل سنة وانت طيبة يااااااااااااااااااااااااااااااااارب

Tarkieb يقول...

ازيك يا ميمي شكلك مبسوطة اوووي من رومانيا....بس انا اعرف ان اكتر نسبة غجر موجودة في رومانيا....وكل الشحاتين في اوروبا جايين من هناك...ا .شكلك قاعدة في حتة سياحية بقى.....

mahasen saber يقول...

تحفه بوست تحفه وبلد رائعه وعرض مذهل
وصور تجنن


فكرتينى بفلم امريكا شيكا بيكا بتاع خيرى بشاره كان صوره هناك

ومراته كمان رومانيه

بجد البوست ده عجبنى جدا جدا

وفرجت الصور لابنى كمان

وردة يقول...

ميمي ازيك
حتنوري اسكندرية والساحل الشمالي كله
من دلوقتي عاملين حالة تأهب قصوي
استعداد لاستقبال المحتلة الاولي عالميا ميمي
بجد بجد حتنورينا
في انتظارك يا قمر
بس انتي مختفية ليه
انتي بتستعدي انتي كمان من دلوقتي ولا ايه
سلام

ابو صهيب ( الجمعاوي الاصيل)سابقاً يقول...

جميلة قوي رومانيا

تروحي وترحعي بالسلامة ان شاء الله

اسماء واحلام فى وجدانى يقول...

ماما بتسلم عليكى

وبتقولك شكرا

ذو الوجه المبتسم يقول...

السلام عليكم
شكلك كده انبسطى قوووووى فى الرحلة
والصور دليل كبير فى القضية دي

اعملى حسابك المرة اللى جاية ان شاء الله هتاخدينى معاكى
على حسابك طبعا
ههههههههههههههههههه
وهو ده اسمه كلام
على حسابى مين يا بنتى
دا انا بخيل مرة ههههههه
مرة بالسعودي يعنى كتير بالمصري

ربنا يسعد ايام دايما وتكونى دايما مبسوطة ومبتسمة

متنسيش بقي تعرفينى امتى هتتفسحى تانى علشان اعمل حسابى

تحياتى

عمك ياض يقول...

ماشاء الله تقرير حلو اوي

اتفسحنا معاكي :)