السبت، 5 ديسمبر 2009

الملك والوزير ..




كان يا ما كان .. يا سادة يا كرام



ومايحلي الكلام إلا بذكر النبي عليه الصلاة والسلام



كان في سالف العصر والأوان .. ملك ..
عنده مملكة كبيرة فيها كل خير من خيرات الله
وقصر كبيييير وخيل كتير وأسطول كمان

والملك كان عنده وزير ..



الوزير كان حكيم وعاقل ورزين
والملك كان دايما ياخد رأي الوزير قبل أي قراريتخذه
مش ضعف من الملك ... لااااا ...
لكن ثقة فيه وفي عقله وتصرفاته

الملك في مرة دخلت شوكة في صباع رجله
فنادي علي الوزير وقاللـه :

- رجلي رجلي


إيه العمل دبرني يا وزير ..



رد الوزير :



- نستدعي الطبيب ، فجاء الطبيب



ووجد أن الأمر يستلزم بتر صباع القدم
وصارح الملك بالحقيقة دي

فسأل الملك الوزير الحكيم ..

- أعمل إيه دبرني يا وزير

رد عليه الوزير ..



- تسمع كلام الطبيب لعل في ذلك ... خير
[ لعله خير !! ]



واستسلم الملك لأمر الطبيب وقام الطبيب ببتر أصبع الملك



وارتاح الملك لمدة يومين ... وعلشان يحتفل بتمام شفائه ،
قرر يعمل رحلة صيد وياخد معاه الوزير

وافق الوزير علي رحلة الصيد ، وجهزوا كل شئ استعدادا لرحلة الصيد البرية



وقبل اليوم الموافق يوم رحلتهم .. تعب الوزير تعب شديد
وزادت درجة حرارته وتم استدعاء الطبيب للوزير

وقال الطبيب إن الوزير محتاج راحة لمدة أسبوع علي الأقل
وإنه مش هيقدر يتعرض لأي مجهود لأن المجهود خطر علي صحته

فكان الحل الوحيد إن الملك يروح الرحلة لوحده
من غير الوزير اللي هوا دراعه اليمين

و قال الملك للوزير: معلش علشان إنت مش هتقدر تيجي معايا رحلتي

رد عليه الوزير : [ لعله خير!! ..]

إتعجب الملك من كلام الوزير لأنه مش زعلان علي السفرية...
وسابه ومشي ..

ركب الملك حصانه مع الحاشية بتاعته

وفي نص الطريق طلعت عليهم عصابة من القراصنة اللصوص

ولما أفصح الحاشية عن هوية الملك ،
فرحوا القراصنة اللصوص بيه
لأنهم كانوا بيبحثوا عن قربان للآلهة بتاعتهم
وإن مفيش أقيّم ولا أفضل من ملك .... يقدموه قربان للألهة اللي بيعبدوها

وفجأة بعد ما وضعوا الملك علي مذبح القرابين أكتشفوا إن صباع رجله مبتور

فتراجعوا عن خططهم علشان مش يصح إنهم يقدموا قرابين معيوبة

فرح الملك بالقرار ورجعوا جري علي المملكة بتاعتهم ..
وأول شخص سأل عنه الملك هوا الوزير..

وحكاله اللي حصل فرد عليه الوزير : [ لعله خير !!]

راح الملك ساءله : ليه قلت [ لعله خير] لما الطبيب أمرببتر أصبع قدمي ؟

رد الوزير : قالـله علشان لو صباع قدمك مش مبتور
كان زمانك دلوقتي مذبوح علي مذبح نذور القراصنة

وسأله الملك : طيب أنت ليه لما مرضت ،
وكان مرضك خطير قلت [ لعله خير !!] ؟؟؟؟
إيه الخير في كده ؟؟؟؟؟؟؟

رد الوزير : أنا لو مش كنت مريض وجيت معاك ،

القراصنة مكانوش هيلاقوا أنسب من وزير الملك قربان ..
يقدموه نذر للآلهتهم
فــ ....
[لعله خير !!!!! ]
.
.
.

هناك 80 تعليقًا:

Ahmed يقول...

بيعجبني اوي المعنى دايما اللي ورا كلامك ياميمايا

لعله خير
كتير بننساها

بس لما بنمر بظروف صعبه ونزهق ونقرف وبعد كده نكتشف ان الشر ده كان في حد ذاته خير, بنتكسف اوي من نفسنا وبنحمد ربنا على اللي كنا فيه وكان نفسنا نخرج منه بأي شكل

Ahmed يقول...

تاني تعليق فقط عشان بقالي كتير معملتهاش

mimi يقول...

أحمد منور يا باشمهندس
والله أنت كده بتزيد ثقتي في مغزي المدونة
ربنا يكرمك يارب ومنور أول وتاني تعليق

ليس فقيرا من يحب يقول...

السلام عليكم

ميمى القمر نورت من جديد

كنت مختفيه فين يابت اوعى تكونى كنتى

غطسانه فى لحمه العيدهههههههههه

حلوة جدا القصه اول ما سمعتها كان من الشيخ محمود المصرى بجد جميله

لو انسان فكر فى ابتلاء ربنا ليه

هيلاقى فى ابتلاءه رحمه

ربنا يسعد قلبك يا جميل يارب

mimi يقول...

ليس فقيرا من يحب
================
رانيا حبيبتي ، أنا غطست في أنجر فتة
والحمد لله أصطدت سمكة كبيرة

أنا اللي حكالي القصة زميل ليا في الشغل بعتبره قدوة وأخ وأب
مش هنساها أبدا وقلت أشارككم فيها

كل سنة وأنتي طيبة وكل ايامك سعيدة يا سكرة

mimi يقول...

ألا أونااااا ألا دوي محدش عايز يعلق

يعلق ... التعليق ببلاش قرب قرب قرب

ايه ده يا خواتي ؟

مين خطف الناس ؟

عاااااااااااااااااااااااااا

♥نبع الغرام♥♪≈ يقول...

اذيك ميمى اخبارك وحشتينا
الحمد لله انك بخير

♥نبع الغرام♥♪≈ يقول...

هههههههههه
لعله خير
كنت سمعت الحكايه دى لكن الفرق انه امر بسجن الوزير عشان قال لعله خير

المهم//
فعلا حقيقى لعله خير يمكن ابتلاء حاليا لراحه لاحقا
يمكن محنه حاليا لمنحه لاحقا
ونفتكر قصة مسى والخضر
خرق السفينه وقتا الطفل وبناء الجدار
فعنما علم الاجابه اكتشف انه خير
ربنا يكتب لنا الخير جميعا فلنصبر قليلا وسنجد القدر فى صفنا لاحقا
تحياتى اليك سلمت اناملك عسوله

♥نبع الغرام♥♪≈ يقول...

انا فاتحه بس مش اون على الياهووووووو

وبكلمك

ياريت تكلمينى او ردى وكمان انتى قفلة موبيلك ليه زعلالالالالالالالالانه منك اوووووووووووووو
كده ينفع

منتظراكى

mimi يقول...

انوووووس
==========

حبيبتي وحشتيني جدااا

فعلا أي شئ بيحصل بيكون في صالحنا

لعله خير

غير معرف يقول...

انا سمعتها قبل كدا يا ميمايه

فعلا امر المؤمن كله خييييير

اسماء واحلام فى وجدانى يقول...

يعنى راجعة ومنورة وبتردى كمان بسم الله ماشاء الله عليكى والله انتى زى الفل

يااااااااااااااااااااااااااااااا
ولا بلاش اصل انا من فترة كده وفاصل شحن لامة دماغى بقت تودى وتجيب
ومش عارف راسى من رجلى

يلا الحمدلله على كل حال الجميل فى القصة دى يااااااااااااااااااااااااااا
اننا نحمد ربنا على كل شىء الدنيا علمتنا انها بتاخد بايد وتدى بالايد التانية

زقطـوطـة يقول...

بحب القصة دي جداااا
ودايما بقول لعله خير
مين عارف ؟
كل سنة و إنتي جميلة :)

Cute Kitty **sookra يقول...

ميمايتى
اولا والله وحشانى
فينك واخبارك ايه لعلها خير
وطبعا كل امورنا "لعلها خير"
بس لو ان نظرنا حاد اكثرمن ذلك لعلمنا وراينا الخير فى كل مايقدره لنا اله العالمين
مساكى شيكولاته

خواطر شابة يقول...

يقال لو اطلعتم على الغيب لاخترتم الواقع.
علينا ان نؤمن ونقتنع ان الله سبحانه وتعالى رحيم بنا وان نتعلم ان نرد كلما يصيبنا الى اراده الله ونقبل به فالله وحده يعلم مافيه خيرنا مصداقا لقوله تعالى {وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ}
تحياتي لك

ايوشة يقول...

جميلة القصة دى مرسيى ليكى ياميمى

thunder يقول...

تصدقى بالله انا عارف القصة وكنت بفكر انزلها مبروك عليكى ولعله خير
اولا حمد لله على سلامتك ومش عاوز ولا عيدية ولا مكرونة يا بخيلة
وفعلا هيشفعلك القصة
لانه الرسول صلى الله عليه وسلم قال
"عجبا من امر المسلم امره كله خير فان اصابته سراء شكر فهو خير له و ان اصابته ضراء صبر فهو خير له"
لكن احنا اللى زى ما ربنا قال
بسم الله الرحمن الرحيم
<"وَالْعَادِيَاتِ ضَبْحاً (1) فَالْمُورِيَاتِ قَدْحاً (2) فَالْمُغِيرَاتِ صُبْحاً (3) فَأَثَرْنَ بِهِ نَقْعاً (4) فَوَسَطْنَ بِهِ جَمْعاً (5) إِنَّ الْإِنسَانَ لِرَبِّهِ لَكَنُودٌ (6) وَإِنَّهُ عَلَى ذَلِكَ لَشَهِيدٌ (7) وَإِنَّهُ لِحُبِّ الْخَيْرِ لَشَدِيدٌ (8) أَفَلَا يَعْلَمُ إِذَا بُعْثِرَ مَا فِي الْقُبُورِ (9) "

يعنى احنا ديما متسرعين ومش بيعجبنا اى حاجة الا لما بنعرف سرها بعد فترة مش وقتها
اختى العزيزة بهنيئك على البوست وعودة حميدة والانسة حنفى وكل سنة وانت طيبة وادفعى العيدية
دمتِ فى رعاية وحفظ الله دائما ياااااارب وبكل حب و ود

لــــ زهــــــراء ــــولا يقول...

حكايه جميله اوى
بس للاسف احنا ساعات بيكون نظرنا قصير جدا جدا ومش بنعرف الا ننظر تحت رجلنا وبس
بس ربنا عنده خير كتير واللى عند ربنا لا ينفذ
تقبلى ارق التحايات

سلمى يقول...

حمدلله على السلامه فينك من زمان غايبه
نورتى مدونتك

جارة القمر يقول...

فعلا لعله خير

انتي فين يابنتي غايبة

وحشتييييييينا

The illusionist يقول...

سلام عليكم
ازيك
بخير
يا رب
كل سنه وانتى بخير
ربنا يعينك
بوستك حلو
عارفه من زمان
بس حبيت اصبح عليكى
اهلا

أحمد عاطف يقول...

كل سنة وانتي طيبة

ولعل كل حاجه خير

تحياتي

mimi يقول...

حنين
====
منورة هنا والفيسبوك

كل سنة وأنتي طيبة أسفة ع الغيبة الطويلة بس أنا هتابعك يا سكرتي خلاااص

ولعل الغياب كان فيه خير
ولعل الرجعوع خير

mimi يقول...

أسماء وأحلام في وجداني
=====================
أنا منورة؟

طيب ألحق أطفي النور لأحسن الكهرباء غليّت جدا
شكرا يا أحمد علي ردودك

يارب يحققلك كل أمنياتك

mimi يقول...

زقطوطة
*******
مش هبقي جميلة من غير جمالكم يا زأطط

بحبكم جدا ووحشتيني يا قمر اوي

عيد سعيد عليكي يارب

mimi يقول...

سكرة
*******
ياللي مساكي دانيت
وصباحك جالاكسي

يجعل أيامك كلها ميلك زي الكادبوري

وحشتيني جدا ،، وأستني عليا يا سكرتي

mimi يقول...

خواطر شابة
***********
بارك الله فيكي

ردك أحسن من القصة نفسها

تحياتي يا سكر

mimi يقول...

أش أيوش
**********
يارب تكوني انتي بخير ، ولحقتي العرض الجديد من فودافون وحشتني مسجاتك

كل عيد يمر عليكي يارب يكون سعيد ياااااارب

mimi يقول...

الرعد الزئبقي
**************
أكيد توارد الأفكار ده نتيجة الرعد والبرق اللي حصلوا أول يوم العيد

أهاااا وأنا أقووووول

مبروك عليك أنت

عيدك سعيد
هات العيدية ... نقدا وعداااا

mimi يقول...

لولا وزهراء
************
أنا عارفة اني مقصرة معاكم ... بس غصب عني الظروف ..

هتابع المدونة ان شاء الله

ولعله خير

تحياتي

mimi يقول...

سلمي
******

مممممممم عندك ليا تاج شايلاه في الخزنة...

ههههههههههه

ربنا يسعد أوقاتك

mimi يقول...

جارة القمر والشمس والنجوم
************************

علياء العاليا جدااااا

أنتي وحشتيني جدا يا عسل وسكر أنتي

طمنيني عليكي يارب تكوني بخيرررر

عيد سعيد

mimi يقول...

زنااااتي
**********

ربنا يسمع منك

بمسي عليك أنا
أهلا
أزيك؟؟؟؟؟

mimi يقول...

أحمد عاطف
***********
نور تعليقك مدونتي
بس بقالك كتير مش متابعني

ممممممم طيب لعله خير

هههههههههههههه
وأنت طيب يارب

Nostor Azzuro يقول...

الحمد لله رجعتى تكتبى تانى

وقصة جامدة

ويارب نفهم ونفذ معناها

الشعب لابد له من حكومه تشكمه يقول...

البوست ده مظهرش فى الريدر لييييييييه عندى؟
المعنى جميل اوى وياريت نفهمه.

وزى رسولنا الكريم: عجبت لامر المؤمن كله خير..حتى الشوكه التى يشاكها المؤمن هى خير,بس احنا نفهم.

adel يقول...

مقولتيش ليه انك عملتي بوست ؟؟
اهو الريدر مقراش اصلا و دخلت صدفة اشاسا

مممم و لعله فعلا خير
اي حاجة بتحصل اكيد ليها سبب
واكيد اكيد للاحسن
ربنا دايما لما حد بيحصله حاجة وحشة بيبقي منع عنه الاوحش منها

mohamed ghalia يقول...

جميلة اوى القصة ياميمايا
ربنا يكرمك ويسعدك دايما
بقالك فترة مختفية؟

mimi يقول...

نوستور أزورووو
****************
ماتريكس ، إنت اللي مش ظاهر خالص

كل سنة وانت طيب .. ويارب القصة والأسلوب يكونوا عجبوك

نورت

mimi يقول...

الشعب لابد له من حكومة تشكمه
******************************
شيمو ... أنا الشعب ،،
علشان كده مش ظاهر عندك البوست في الريدر
هههههههههه
كلامك والله أضاف بعد جديد للبوست
تسلم أفكارك ، طبعا عندك حق

mimi يقول...

دولا
*******
أنا مقلتش ؟ طب أنا أجرت مايك كبيررر وعدي علي الكل المدونين ، بس أنت كنت نايم أكيد

البوست اتكتب في ساعة رضا

ومش تسألني مين رضا ده ،، علشان بتكسف :)

mimi يقول...

محمد غاليا
***********
ربنا يخليك يا محمد يارب ومش يحرمني من سؤالك ..

ومختفيه ممممممممم ... لعله خير

كل سنة وأنت طيب

مي يقول...

فينك يابنتى وحشانىىىىىىى اختفيتى ليه كده ؟؟؟؟؟؟؟
بس لعله خيررررررررررر!!!!!!!
هايلة

همس الاحباب يقول...

لعله خير
يااااااه حروف بسيطة تحمل من المعانى الجميلة الكثير والكثير
القصة رائعة ولها مغزى وعبرة
تسلم الايادى
تحياتى

عاشقه الرومانسيه يقول...

تعليق غبى
بس قلته لنفسى بصراحه
ههههههههههه
هو الوزير كان عالم بالغيب؟
يعنى كان عارف اللى هيحصل؟
وطبعا رديت على نفسى انه مش كان يعرف حاجه بس هو قال لعله خير
لان ربنا بيجيب لنا كل خير حتى لو احنا مش شايفين الخير ده بنظرتنا المحدوده
جميل معنى القصه قوى ياميمى
انتى بتغيبى ليه كده؟
وحشتينى موت يابنوته

well يقول...

لعله خير
القصة دى انا قريتها من مدة على احد المواقع مع اختلاف بسيط كان بدل الوزير (صديق الملك) وكان صوباع يده هو الذى قطع
المهم وانا فى الشغل اصبت بجرح فى احد صوابع يدى ..كنت مضايق بجد بس قولت لعله خير
و والله العظيم كان خير
تحياتى

blue-wave يقول...

حلو معنى القصه
وفعلا محدش عارف الخير فين
تحياتى

Unknown يقول...

ميماياااااااااااااا
ازيك
هو الوزير كان اتسجن بس مش مشكله كويس انه عيا و مدخلش السجن
لعله خير

طبعا المعني وراها التسليم بالقضاء و القدر خيره و شره

ليكي وحشة كبيرة و ايه اخبار رومانيا ههههههه

ياريت تيجي تزوري البوست الاخير عندي عشان لو تحبي تنضمي لمشروع الربح من الانترنت ربنا يسهل احنا دلوقتي حوالي 3 و ياريت تساهمي معانا شوية بالاعلان عن الموضوع لو عاوز

Unknown يقول...

قصة رااااائعه
يعطيكي العافية ياااااااارب
اشتقنالك كتيرو الله
موفقة

Unknown يقول...

من اجمل الحاجات اللى قريتها بس مش عارف ده من بنات افكارك و لا منقوووول
اى ان كان حلو اووووووووووووى
بس فى حالتنا الشعب هو اللى حيروح
فى الوبا و القراصنه حيأخذوه
:-(

osama44 اسامه 44 يقول...

مييى
بجد حلوه اوى
لعله خير
بجد جميله
وهو النظره المستقبليه للاحداث

غير معرف يقول...

طيب وبعدين ننام يعني ولا اية؟

حلم بيعافر يقول...

لعله خير
قصة جميلة اوى

صوت من مصر يقول...

عشان كده العربية خبطتنى امبارح عندك فى شبرا شفتى بقى
لعله خير

لــــ زهــــــراء ــــولا يقول...

ربنا يوفقك ويكرمك واحنا فى انتظار تشريفك لنا فى اى لحظه

الحــ ــزين يقول...

طول عمرك جميلة
قصة رائعة
و.........
لعله خير
دومتى بكل خير

الفراغ يقول...

بجد ياميمى كلامك عجبنى
ويعجب اى حد طبعا
وطبعا صدق رسول الله صلى الله عليه وسلم عندما قال:
عجبا لامر المسلم..كله خير
ان اصابه خير شكر وان اصابه ضر صبروفى كلا خير

جمهورية شومبونجو العربية يقول...

تسلم ايدك بجد

كلامك فوق الرائع بجد والله

احيكى

وده دليل على الايمان بقضاء الله

والتفأل بل خير فى حد ذاته ايمان

تحياتى ليكى

رئيس الجمهوريه

3aziz 3eni يقول...

خير انشاءالله
كله خير
الحمد لله

اسماء واحلام فى وجدانى يقول...

شكرى شاف بطاريات كتير وقليل لكن زى البطارية دى ماشفش ابدا ايه ده ياربى بطارية تفضل مريحة كام اسبوع ايه البلد مش فيها كهربائى بطاريات

Tamer Moghazy يقول...

فكرتها حلوة...وبتخبي وراء الكلام ...كلام.وكلام..وكلااام :)

فشكووول يقول...

ازيك يا ميمايه

كل سنه وانت طيبه

على فكره لعله خير ان انا تعبت فى العيد يمكن لو مش كدا كنت عملت حاجه وحشه ولا جرى لى حاجه وحشه ولا حادثه فى طريق لكن الرقاد يمكن يكون نجا الواحد من حاجات كتير .. لعله خير وحكمة الله لا يعلمها احد سواه سبحانه وتعالى

تحياتى وكل سنه وانت طيبه

سجود يقول...

السلام عليكم
طبعا القصه تحفه
انا كنت عارفاها ومع ذلك قراتها تاني ولو حد قالها ليا تاني هسمعها
وجزاكم الله خير

amirelhob يقول...

لعله خير انى قريت التوبيك ولعله خير انك اختنا فى التدوين لعله خير اننا اتغلبنا من الجزائر عشان نبقى ايد واحده لعله خير اننا عندنا حكومه غبيه نوعا لعله اننا طيبين اوى لعله خير اننا بنحب ونكرم بجد لعله خير وخير وخير ومن قلبى بقى بتمنلك كل خير وسعاده وصحه وتوفيق وفرح وابتسامه تدوم يا رب طول العمر

kimo يقول...

لعله خير
جميل اوي
والاجمل لو قدر الناس
يحققوا مبدا الرضا
وان الانسان يريد الله به كل الخير
وخير مثال سوره الكهف
وما دار بين سيدنا موسي والخضر عليهم افضل السلام
دائما رائعه

Heba Faruq يقول...

ربنا يجعله دائما خير ليك ولينا جميعا يارب ويسعدك
قصة فعلا جميلة

دمتي في كل خير

Tamer Nabil Moussa يقول...

حكاية جميلة

وليها معنى رائع


تسلمى عليها

مع خالص تحياتى

Remas يقول...

حلو اوى البوست دا يا ميمى

وفعلا لو قلنا على كل حاجة انها ممكن تكون خير هنرتاح اوى

وفعلا كل اللى يجيبه ربنا خير لاننا لانعلم ما وراءه

انتى وحشانى اوى يا ميمى بجد

فينك ياقمر ؟

♥نبع الغرام♥♪≈ يقول...

وحشتينى يا طنط اووووووووووووى

جيت اسلم
واجرب الاسم الجديد

كح كح

ايناس

أميرة علي كوكب مهجور يقول...

ربنا دايما كاتبلنا الخير ربنا مش هيظلمنا ابدا

فكرة من الزمن ده يقول...

ميمايتيييييي
لعله خير
اني اتاخرت
جميلة بجد
تسلم صوابعينك ياقمر
بس بردو مش هتهربي
لازم تحكي
احكي
احكي
احكي
ياشهرميمايتي
مستنية
احكي

فكرة من الزمن ده يقول...

بحبك يا ميمايتيييي

اسماء واحلام فى وجدانى يقول...

والله يا ميمى
الواد شكرى ده واحشنى اوى
بس اعفا يعنى ايه
ده احنا دفنينه سوا
وعارفين اللى فيها كمان
هى الشريرة
لامة تقع تحت ايدى بس

Cute Kitty **sookra يقول...

ايه ياست ميمايا
انتى موش حكيتى اللى حصل ليه
فكره قالت انك هتحكى
انا مستنيه
يلا بقى
احكىىىىىىىىىىىىىىىىىىىىى
بسرعه

وردشان smilyrose يقول...

ميمومه

وحشانى جدا

اول زيارة لعله خيرا

هههههههههههه

ربنا يستر

جميلة جدا القصة

وررائها معنى جميل وكبير

ويليت نا نتعلم ونتعظ

دمتى حبيبتى

لى عندك احتلال

ولكننى اتمنى ان احتل قلبك

بلال عادل رجب. يقول...

القصة جميلة جدا والله ولعله خير ان انا قريتها
-
وابقى سعيد ان زرتى مدونتى لعه خير ان لو زرتيها
هههههههههه

soly88 يقول...

ازيك يا ميمى
وعسى ان تكرهوا شيئا ويجعل الله فيه خيرا كثيرا
ودوما الانسان عجول
ولذلك كان قول الله لرسوله :
(ولسوف يعطيك ربك فترضى )
فالرضا عطيه ربانيه
لهذا كانت كلمتى (الحمد لله)
تعنى الكثير

ضحكات الحياة يقول...

ميمي

بجد قصة حلوة جدا و ممكن كلنا نستفيد منها
و نعرف ان مفيش الحمد لله حاجة في حياة الانسان و حشة كل خير بالنسبة للانسان

بجد عاشت ايديكي علي القصة الرائعه دي

طهر فؤادك يقول...

السلام عليكم ورحمة الله وبركاتة

ماشاء الله قصة جميلة بارك الله فيكى ... وكمان القصة دى تبين وتشبة وماخوذة من قول رسولنا العظيم سيدنا محمد صلى الله علية وسلم فيما معناة ان امر المؤمن كلة خير اذا مسة ضراء صبر واذا مسة سراء شكر .... فياعظمة نبينا محمد صلى الله علية وسلم ...

فبارك الله فيكى على القصة الجميلة دى

ةاحب ابشرك ان فية حملة ياريت تشاركونى فيها والدعوة مفتوحىة لكل من يحب بأذن الله على مدونتى فياريت تطلعوا عليها وبراك الله فيكى وفى المسلمين اجميعين ان شاء الله

career consultant يقول...

السلام عليكم ورحمة الله وبركاته
الكريمة المحترمه Mimya

بعد التحية
فلعله خير فعلا أن اصل لصفحات مدونتك الكريمه
حقيقة اشعر فى كل جوانبها بالابداع وبالمعانى وفى نفس الوقت بالتحرر
على راحتك فى كل ما تكتبين وما تتناولين وما تعدلين
وهى من صفات المبدعين
اختى الكريمة هناك موضوع اريد ان احادثك فيه خاص بالربح من ادسنس عن طريق مدونتى ولكن ينقص الفكرة الترجمة وقد وجدتها معك
فاذا اردت ان نكمل فى التفاصيل
فبرجاء زيارة مدونتى والتواصل
مدونة لا تذهب بعيداً
www.dontgofar.blogspot.com
قصص رمزية تساعدك فى تغيير الكون