رومانيا رايح جاي (( الجزء الثاني))

أهلا ومرحبا بكم علي متن مدونتي MIMAYA واللي كنت بفكر أغير أسمها الي MAMAIA

نسبة لأجمل منطقة في رومانيا ... لكن مهنش عليا أغير أسمها ... وهتفضل مدونتي ميمايا علي أسمي

وحشتوني جدا جدا ... وعدتكم بإني هحكيلكم عن الرحلة لرونانيا بالتفصيل ... وعلشان خاطر الحبايب ... بالصور كمان ...

إن شا الله ما حد حوّش..

الصورة دي صورة الطيارة اللي ركبناها وإحنا في مطار القاهرة القديم ... علي طيران تاروم

زي ما قلت في الجزء الأول من البوست

وكانت الساعة 3.30 فجرا .. وكان الجو تحفة وروعة ... وكنت بحاول أستمتع بكل لحظة تعدي عليا ... كان معايا أصدقاء كتير بيتريقوا عليا علشان بصوّر عمال علي بطال ... ودلوقتي بيتحايلوا عليا ابعتلهم الصور ... إيه رأيكم ابعتهالهم؟ ولا أبقي شريرة كالعادة ؟

انتوا اللي هتقولوا ...

الصورة دي صورة واجهة مطعم علي البحر الأسود ...

الورد ده طبيعي 100% .. وبيتغير كل يوم ، وريحة المكان كله عطور وورد الصورة دي في كونستانسا مش في بوخاريست

الصورة دي صورتها وكنا في الاتوبيس في بوخاريست ، وكان فيه تجمع سيارات وناس كتير ولما سألنا قالولنا إن ده سباق سيارات ومقام أمام قصر تشاوسيسكو رئيس رومانيا الأسبق، والمبني ده 1000 متر فوق الأرض و 1000 متر تحت الأرض

ديانة الرومانيين أساسا المسيحية ، والكنائس مبنية بصورة معمارية تنم عن ذوق عالي ورفيع المستوي ، وممكن مش تعرف تفرق إن كان ده مسجد أو كنيسة إلا إذا شفت الهلال فوق المدني أو الصليب ... ودي صورة للمسجد من الداخل ونسبة المسلمين في رومانيا نسبة كبيرة علشان الأتراك اللي عايشين هناك

صورة أخري من زاوية مختلفة للمسجد ... المسجد ده موجود في كونستانسا

ده جسر يمر من فوق نهر الدانوب ، وهذه المنطقة تسمي دلتا الدانوب ، المنظر من فوق رائع بجد

لما رحنا بوخاريست ، كان يوم أحد يعني كان يوم عطلة ، وشفت عروسة وعريس بيتصوروا أمام مبني ... قلت يمكن كنيسة كبيرة أو كاتدرائية أو حتي مزار عام ... الفرح كان الساعة 4 عصرا ،، يعني مش بالليل زي عندنا ،، وكانت العروسة فرحانة أوي بالناس اللي من كوكب تاني اللي هما إحنا لما حبينا نتصور معاهم ... وفرحت أكتر لما عرفت إننا فراعنة .... أأأأأأأقصد مصريين يعني ..

طلع المبني ده إيه ؟

طلع المبني ده متحف المدينة وعندهم عادات يتصوروا كده قدامه وعلي السلالم بتاعته ... زي كوبري اكتوبر كده في القاهرة

كان نفسي اروح ازور قصر دراكيولا ... بس المسافة بعيدة جدا عن أماكن تواجدنا .. زي من القاهرة لأسوان كده ،، بس جبت صورته ،، وطبعا الحاجات هناك غالية جداااااااااااااااااا يعني عمار يا مصر

الصورة دي في بوخاريست ،، لمبني وزارة العدل الرومانية ،، شايفين الشوارع .... مرايات

الناس اللي في الصورة دول معرفهمش علي فكرة !!!

ده بقي أقدم بنك في رومانيا وموجود في بوخاريست ، شكله جميل جدا وتحفة معمارية

الصورة دي في وسط المدينة ،، في كل كام متر هتلاقي ساعة وهتلاقي مؤشر درجات الحرارة وإشارة مرور والغرامة فورية للي يكسر الإشارة أو يعدي الشارع في غير الأماكن المخصصة للعبور ... نظام بقي نقول إيه؟ حسرة علينا

كارفور ... أتاريه سلسلة عالمية في رومانيا وبلغاريا ومصر وكام دولة تانية ... صرح تجاري هايل ،،

الصورة دي صورة لشاطئ في مدينة أسمها مانجاليا ،، بين بوخارسيت وكونستانسا ...

الشاطئ ده مجاني ،، بتدفع بس تمن الكرسي والشمسية ... تخيلوا ده المجاني ؟ اللي بفلوس بقي شكله إزاي ؟؟؟؟؟

منجاليا وصورة للبحر الأسود عن قرب ... منظر مريح جدا للأعصاب

دي بقي كابينة التليفريك ... مش وسيلة أنتقال هناك ،، لأ ... دي وسيلة للفسحة التذكرة الواحد ب 22 يورو ولمدة 10 دقايق بس !!

بس بترتفع ارتفاع جبار .... وتشوف البحر والناس كأنهم ألوان مرسومة علي ورقة ... الباب ده بيتقفل اوتوماتيك لما حد يركب فيه ،، والكابينة الواحدة حمولة 4 أشخاص ... وفيه فتحات للتهوية ... ولو النور قطع كل سنة وأنت حضرتك طيب ...

السيسي ... حصان صغير في منطقة الملاهي بيأجره الأطفال لمدة عشر دقايق يتمشي بيهم شوية ، وممكن يتصور كمان ( كل حاجة بأستئذان ... يعني اللي بعمله ده غلط ... )

بائع البالونات ... علي شكل مهرج ... وبيتكلم كتير والناس بتضحك ... بيقول إيه ... ولا انا عارفة

المنظر ده من بلكونتي ... الجمال هناك 24 ساعة في اليوم ... يعني عرض متواصل ليلا مساءا

ده شاطئ البحر الأسود اللي أسمه (مامايا ) في كونستانسا

وعلشان محدش يمشي في الرمل ،، معمولة علي الارض مشايات من الخشب

دي صورة من المطعم في الفندق ... الفطار والغدا في مكان ... تشوف فيه زرع وخضرة مع كل قطمة ...

ده غير ان أكلهم صحي

وهواهم صحي ...

الحمد لله علي كل شئ

عااااااااااااااااااااااااااااااا

الصورة دي صورة ماريا صديقتي ... اللي أسمها ميمي برده ... ودي خطيبة ((عادل)) صاحب مدونة البلد دي فيها حكومة وهوا خطبها مني ... ووعدته بنشر صورتها ... دي عربيتها الخاصة يا عادل وبتقوللك مش عاوزة بس غير رضاك عنها

كوستا كافيه ... أول ما شفته حسيت بحنين لمصر ،، والجامعة الأمريكية وأيامها ،،

ويااااااااااه

العيال أصحابي اللي مدمنين الموكا والشيكولاته البيضا السخنة ...

ومن هذا الكافيه أرسل سلامي الي شارع جامعة الدول العربية ... ,وأقوللـه ... تحيا مصر

ورومانيا كمان

اعلان عن مطعم بيتزا ... والتمساح ماسك قائمة طعام مكتوب عليها (( بالهنا والشفا )) بكل اللغات ... مفيهمش عربي ... عاااااااااا

ده بقي الأتوبيس ... وسيلة المواصلات العادية هناك ... علشان مفيش كثافة سكانية ... مفيش كثافة علي أي حاجة

متسمعش أصلا صوت كلاكس عربية ... ولا صوت حد بيزعق ... ولا صوت حاجة خالص

هوششششششششششششششششش هدووووووووووء

في بوخاريست زرنا كافيه ... صاحبه مصري الجنسية .. عايش هناك ... الكافيه بيقدم مأكولات مصرية ورومانية ... وشيشة ومشروبات مصرية ...

الشوارع نضيفة ... والهواء نقي ... والحياة بجد بيس يا مان

الجو ساعات سقعة وساعات حر وساعات مطرة ... بس في كل الأحوال ...

أنت في أوروبا يا جميل

أيام الشغل شغل ... وأيام الأجازات أجازات بجد

كل يوم جمعة باليل والسبت طول اليوم والأاحد طول اليوم ... ديسكوهات في الشوارع ومسابقات وأغاني وحفلات شواء في الهواء المفتوح

وعروض ترفيهية ... ومهرجانات .... استمتاع بكل الوسائل ... دي بنت في جزء من عرض في "مامايا"

التليفريك ... من بعيد جدااااااااااااااااا

قائمة طعام المطعم المصري ... يوجد عنده وجبات بأسماء المدن

وجبة كايرو

وجبة اليكس

وجبة كوم أمبو

وجبة الأقصر

شاطئ الأسترخاء في "مامايا" كونستانسا

ماكدونالدز ... حبيب قلبي ... في أكبر مول تجاري فيكي يا رومانيا ....

سفينة كبيرة ضخمة في أول كونستانسا ... علشان ترحب بالزائرين وتعرفهم إن هنا (CONSTANSA)

[ ملحوظة : بتتكتب بالروماني كونستانتا وبنقراها كونستانسا ]

بدون تعليق ....... حاجة كده من غير كلام ...

تاكسي رومانيا .... تاكسي العاصمة

أنا كده خلصت الجزء التاني

الجزء التالت هكتب فيه عن مواقف حصلتلي ..

ويارب الموضوع يعجبكم

ومش تنسوا تباركوا لعادل

ألف ألف يورو

قصدي ألف ألف مبروك يا دولا

.

.

شهادة لله ... أغنية طارق الشيخ

شهادة لله
لا جرحتنى

ولا خونتنى

ولا يوم قاسيت وانا جنبك

شهادة لله
لا قابلت انا .. حنيتك

ولا شوفت طيبة قلبك

كل لحظه وكل ثانيه جنب منك .. عشتها

بعترفلك انى بعدك عمرى ما قلبى حسها

شهادة لله

انا بالأمانه خسرتك

***

كتير خاصمتك كتير ظلمتك
ومن حنانى ....
كتير حرمتك

ولما غبت عن عينى فجاءة ..

فى لحظه فوقت
وعرفت قيمتك
ااااااااااااااه لو كان بكايا عليك
هيهدى تعذيبى
انا كنت هبكى عليك

طول عمرى يا حبيبى
شهادة لله
انا بالأمانه خسرتك

***

واحشنى صوتك ونفسى اقولك

واحشنى زعلك .... واحشنى كُلك
وكل املى تكون سامعنى يارب صوتى
يكون واصلك
بصرخ بعلو الصوت
من نارى ولهيبي

انا كل ثانيه بموت فى البُعد يا حبيبى
شهادة لله

انا بالأمانه خسرتــــــــــك

***

إهداء الي :
دِنِدن ...

قطي الحبيب اللي مات

الأغنية للأستماع

.

.

رومانيا رايح جاي

الشوارع بتلمع ، مفيش تراب ، مفيش ضوضاء ، مفيش أي إزعاج ....

دي صورة مزارع دوار الشمس في طريق بوخاريست

أول مفاجأة قابلتها في رومانيا .... وأزهلتني من الفرحة وتنحت منها ..........هيه إن المكان اللي علي شاطئ البحر الأسود أسمه "مامايا " mamaia يعني بينطقوها "ميمايا "

وده عنوان المدونة بتاعتي ... حسيت إحساس مش هقدر أوصفه من السعادة ... وافتكرتكم كلكم في اللحظة دي ...

وقررت من ساعتها أغير حروف أسم المدونة علشان تبقي mamaia بدلا من mimaya

"مامايا" دي علي ساحل البحر الأسود تابعة لمقاطعة كونستانسا التابعة لأقليم دوبروجا

" تقسم رومانيا إداريا الي 9 أقاليم و41 مقاطعة "

خريطة موقع مامايا وكونستانسا

ودي أول مفاجئة ليا شفتها وتنّحت قدامها ...

تاني مفاجئة إن مديرة العلاقات الدولية الرومانية اسمها " ماريا"

طب فين المفاجئة ؟؟؟؟؟؟

لما جيت أمضي علي أستلام مفتاح غرفتي بالفندق كتبت "mimi"

علشان هيطبعولي بادج علي المفتاح بأسمي "بدلا ما يخبط حد علي الباب ويقوللي ....

أنتي يا حلوة ... ولا يا شاطرة .... ولا يا كتكوتة ..."

لقيت ماريا بتقوللي إن ده أسمها (دلعها) بين المقربين من أصدقائها .... ومن هنا لقيت مفاجئتين ميمي ومامايا

ويا محاسن الصدف

علي رأي مايكل أنجلو في حلقات النينجا تيرتلز من حوالي كام سنة كتيييير فاتو

وطبعا عملت حسابي وأشتريت كمامات بعدد شعر راسي وكنت خايفة جدا من انفلوانزا الخنازير ذلك الوباء الذي كنت أعتقده كذلك

ومش لقيت غير المصريين بس اللي عاملين المهرجان ده كله عليه ولما سألت هناك ليه مش خايفين كانت الأجابة ان الانفلوانزا العادية أشد منه خطوره

وبس ...........

رحت المطار ولبست الكمامات أنا وكل اللي معايا المصريين...

وهوووووب ...... إحنا بس اللي متكممين...

طب ولا حتي في الجوازات؟

ايه ده !!

ولا حتي عند وزن الشنط ؟

الاجابة : NO

لاأأأأ .... وكمان طلبوا مننا في الجوازات نخلعها علشان التأكد من الهوية ...

قلنا ما بدهاش وخلعنا كلنا الكمامات .... وعشانا عليك يارب ..

في الطيارة احنا سافرنا علي الخطوط الرومانية اسمها "TAROM" وكانت ممتعة الرحلة خصوصا

لحظة شروق الشمس

منظر تحفةةةةةةةةةةةةةة

و لحد وقت توزيع وجبات الإفطار علي الطيارة .......

أن أن أن تش

علب ملفوفة بشكل شيك جدا وريحة الأكل تجنن خصوصا اننا مش أكلنا قبلها بيوم من التوتر

العلبة فيها إيه؟؟؟؟؟؟؟؟؟؟؟؟؟؟؟؟؟؟؟؟؟

فيها لحمة وبيض مقلي مرصوص تحت اللحمة .....

هات ياعم المضيفة دي نسألها.... وبسؤال المتهمة أاقصد المضيفة عن مصدر هذه اللحوم أجابت :

- Carne de porc

هاه ؟؟؟؟

- بتتكلمي انجليزي يا بت ؟

- Pig meat

يعني بالعربي لحوم خنزير ....

شكرااااااااااااااااااااااا

- ممكن نبدل الوجبات بتاعتنا ... مش بناكل لحوم الخنزير ... إحنا Musulmani ؟

- الوجبة موحدة يا حلوة .... كنتي قولتيلنا وانتي بتقطعي التذاكر علشان نعمل حسابكم

تشربوا شاي؟؟؟؟؟؟

كل الطيارة أصلا مصريين .... كتير فهموا ورجعوا الوجبات

وإحنا أكلنا سلطة .... وشربنا شاي وقهوة

لمدة 3 ساعات من المتعة فوق السحاب ... وصلنا مطار بوخاريست عاصمة رومانيا

الجو برد ... برد .... برد .... وإحنا مصيفين طبعا

قالولنا كانت بتمطر بقالها يومين قبل ما تيجوا

نزلنا في بوخارست ومكنش فيها أي فسح خالص علشان المؤتمر... بس بالنسبة لي التعرف علي ناس جديدة ومحاولة الـتأقلم مع جو جديد وكمان اكتساب خبرات ... هيا دي الفسحة عندي

وأخدونا لمقاطعة تانية اللي فيها الشاطئ بتاع مامايا

رومانيا جميلة جدااااا وهادية جدااااااااا ما تسمعش فيها صوت كلاكس عربية ... الشوارع بتتنضف الساعة 11.30 بالليل يوميا

كل متر مزروع فيه شجرة ... مفيش تراب في الجو ... مفيش رطوبة .... كل اللي كان حوالينا يا إما خضرة وزرع يا إما شط وبحر

المناظر الطبيعية روعةةةةةةةةةةةةةة

تنفع خلفيات للديسك توب علي الكمبيوتر

الشوارع بتلمع لما تمطّر وكأن الأسفلت مرايات

المناظر الطبيعية الجميلة مخلية أعصاب الناس هادية جدا ... محدش بيزعق

محدش زعلان ... كل واحد في حاله

ولو عملت إيه ... مستحيل حد يبص عليك

مستحيل بمعني مستحيل

في اليوم الواحد ممكن تسمع خمسن كلمة " سكوزا " وتسعين كلمة "نو بروبليما"

يعني أسف ومفيش مشكلة

اتمني لكم اوقات سعيدة زي اللي قضيتها في رومانيا

وللحديث بقية في رومانيا رايح جاي ( 2 )

ملحوظة : مدونتنا الجديدة إيد واحدة تحت أمركم

تابعوني ......

.

.

وحشتوني ... جدا كتير أوي خالص

بونا زيوا عليكم يا حبايبي

ومولتسوميسك كتير علشان سؤالكم عني في غربتي

وتشي ماي فاتش كلكم ؟

بونا ؟؟؟!!!!

طيب الحمد لله

انا الحمد لله جيت من غير انفلوانزا الخنازير ... مشفتش محدش خايف ومرعوب من فيروس ضعيف اوي كده زي المصريين

المهم ...

أنا هكتبلكم عن رحلتي ...

" رومانيا رايح جاي "

من النهاردة ان شاء الله

والمفاجأة ....

.

.

مش دلوقتي

.

.

.

استنوا شوية

.

.

.

أشوفكم علي خير

أنا سافرت رومانيا ....

هحاول أتواصل معاكم ... وأحكيلكم بالصور عن الرحلة من أول المطار في مصر

ولحد المطار في بوخارست عاصمة رومانيا ...

أنا مسافرة في شغل ... وده مايمنعش الفسحة برده

ربنا يسعدك أوقاتكم كلها

ومش هغيب كتير

.

إن شاء الله طبعا

.

هتوحشوني

.

.

أبني حبيبي .... قبل ما تيجي ..+ تحديث

ابني حبيبي ...
قبل ما تيجي ..

أنا بوعدك اختارلك أبوك
وأملا الكون .. ناس بيحبوك
اختك عمك .. خالك أخوك
مين تآمنهم ويأمنوك

ابني حبيبي ...
قبل ماتيجي ..

انا هاختارلك .. أسم يناسبك
تفرح بيه .. كل أما أندهلك
تفخر بيه قداّم أصحابك ..
وتشكر مامي وتشكر أهلك

ابني حبيبي ...
قبل ماتيجي ..

أنا هتوصي بأكلي شوية
علشان تيجي بصحة قوية
وأخلّي حياتك .. عيشة هنية
طيبة أمان .. ود .. وحنية


ابني حبيبي ..
قبل ماتيجي ...

انا بوعدك أسعدلك حالك
ولا يشغل مستقبل بالك
إن تزعل راح أقوللك مالك
وأحمل همك وأبقي بدالك

ابني حبيبي ..
قبل ماتيجي ...


انا بوعدك احفظ حواديت
وأغني وأشخبط شخابيط
علي جدران أودتك والحيط
دي صورك يا بني هتملا البيت

ابني حبيبي ...
قبل ماتيجي ..

انا بوعدك أتعلم أصبر
وأقرا كتب عن سنّك أكتر
وأحلملك أحلام .. تتفسر
وأكتبلك أشعار لو هقدر

ابني حبيبي ..
قبل ماتيجي ...

أنا بوعدك اتحدي الدنيا
وما تغيب عن أحضاني لثانية
انت حبيبي وكل حياتي
وما يهمش في الكون حاجة تانية

ابني حبيبي ..
قبل ماتيجي ...

انا بوعدك انك تفهمني
وتعرف قيمة إثبات إني ..
قبل ما اشوفك .. قبل ما احسك
كنت ضنايا .. وروحك مِنّي

ابني حبيبي ..
قبل ماتيجي ..

.....

. وحشتوني .

.

التحديث

.

شكرااااااااااااااااااا

.

.

عدناااااااااااا ومش هحرّم

برغم اني بتسرق والدليل قالوله

http://egyfilm.com/Forums/viewtopic.php?t=256100&view=previous



مش مرة واحدة ....

http://egyfilm.com/Forums/viewtopic.php?t=256201&view=previous&sid=4f4f7c789bb488cbd9a98af0be56ec02



ولا مرتين ... لا ااااااااا

http://egyfilm.com/Forums/viewtopic.php?t=256184&view=previous



ولا حتي تلاتة ..........

http://egyfilm.com/Forums/viewtopic.php?t=256184&view%20http://egyfilm.com/Forums/viewtopic.php?t=256137&view=previous=previous



بس مش هحرّم اكتب بوستات ....

غصب عني

احبائي واصدقائي

اسفة علي التأخير عليكوا جداااااااااااااااا

النت عندي فاصل ومش عارفة أتواصل

عااااااااااااااااااااااااااا

أنا بخير ... وكله تمااااااااااااام

راجعالكم قريب جدا إن شاء الله

أنا كنت تعبانة شوية ... بس عمر الشقي بقي

نيااااااااااااهااااااااااااااااا

احتلاااااااااااااال

قلبي للإيجار .. مين يأجره ؟

انا بعرض قلبي للإيجار ،

مين فيكو قال .. هأجره ؟
ده كلام بجد ومش هزار ..
دا خبر جديد ... بفجّره .

قلبي الضعيف ...
دا قلب مليان بالحنان .
والحب بس يحرره .
أربع منافـع للأمان ،،
بتمن بسيط هتقرره ....

مين راح يقول .. هيأجره ؟

قلبي الحبيب ...
دا قلب طيب وابن ناس .
مش من دهب ولا حتي ماس .
بينجرح مرات كتيييير..
ونفس الغلط بيكرره ...
مين فيكو قال .. هيأجره ...؟

قلبي الرقيق ...
كان لِيه صُحاب بيحبهم .
في الشدة واقف جنبهم .
سابوه وراحو كلهم ..
من غير ما حتي يبرروا .
مين فيكو قال .. هيأجره ؟

قلبي الغبي ..
آل قلب راسي ..
بيتهزم .. وكأنه ناسي ..
وأعتب عليه ..بيقوللي ليه ؟؟؟
عملت إيه !!!؟؟
ونفس السؤال بيكرره

مين فيكو قال .. هيأجره ؟

قلبي الجرئ ....
ما بيتخنق من أي شئ...
لِيه مبدأ إنه يعيش صديق.
طيب بأه .. خليه كده .....
غدر الصحاب .. هيفكره .

يا مين يقول ... هيأجره ؟

قلبي العبيط ..
تاخدوه ببلاش ...؟؟
تستبدلوه بأتواب قماش؟؟؟؟؟
موافقة جداً ...
ولا عمري يوم أستخسره ..

مين فيكو قال هيأجره ؟

قلبي بمشاعره منه فيه..
لا تلاقي زيه ولا تلاقيه ،،

طب أعمل إيه !! مولوده بيه..
ما تأجروه ... هتوفروا ...

لو هتبيعوه هتكسبوا ولا تخسروا ..
طيب بقي ......!!!!

مين فيكو قال هيأجره ؟

؟

؟

؟

فارس أحلامي .... + تحديث

فارس أحلامي هُمام


كِرشه .. لمترين قدام


يتغدي لحوم وفراخ


والعشا يتعشي حمام





فارس احلامي هُمام





فارس احلامي بطئ


وكلامه رغي خنيئ


وأول ما يحس بضيق


بيشد لحاف وينام





فارس احلامي هُمام





فارس أحلامي بخيل


ومع أنه عريض وطويل


بيصرف قرشه بعويل


ويلبس لبس الاقزام





فارس احلامي هُمام





فارس احلامي حويط


وبيمشي في جنب الحيط


دا في مره قابله عبيط ...


راح ساءله ساعتك كام؟





فارس أحلامي هُمام





فارس احلامي لغات


لهجته لهجة بشوات


عضلات جسمه .. مصدات


علشان يعجب ستات ..


يترمّوا عليه .. وأوام





فارس احلامي هُمام





فارس احلامي دا ديب ..


بيطفش أي غريب ،،


عدو كان أو حتي حبيب


ويحط في بقه لِجام





فارس احلامي هُمام





فارس احلامي عنيد


سلاماته مش بالإيد

وفي كفه خُف حديد

حركاته بالتـاكيد


محتاجة بنط لحام





فارس أحلامي هُمام





فارس احلامي رومانسي


بيحب أصالة ونانسي


أجمل افلامه .. المنسي


طموحاته كلها .. أحلام





فارس احلامي هُمام





فارس احلامي طبيعي

زي الأُس التربيعي

في شتاه .. انا بلقي ربيعي

وياه العيشة تجــــنن


ومعاه الدنيا سلاااااااام



عااااااااااااااااااااااااااا





فارس احلامي هُمام


.

التحديث

ــــــــــــــــــــــــــ
http://advsarab.blogspot.com/2009/05/blog-post_30.html?showComment=1243640467064#c1185598463335206973

.

شكراااااااااااااا
.