العبارة في السفارة 2

العبارة في السفارة 1 هتلاقيه (هنـــــا)

جه معاد تثديم الأوراق المطلوبة في السفارة وهي:
صورة اول اربع صفحات من جواز سفري الساري
جواز السفر نفسه
صورتين شخصيتين
حجز طيران
تغطية تأمين سفر دولي
ورق يفيد الغرض من الدخول لإيطاليا

دي الطلبات الموجودة علي الموقع الإليكتروني للسفارة
دخلت الشيكارة
أأأقصد السفارة
وقدمت الورق اللي معايا وأخدن رقم
تخيلوا الريقم اللي أخدته كان كام؟؟
سامعة حد بيقول 13
هرد عليه وأقوله يااااريت
انا أخدت رقم 628
تقوللي ال 627 اللي قبلك جم أمتي ؟؟؟ انا معرفش
طب دول هيروّحوا الساعة كام
هقولكم برده معرفش !!
انا اخدت الورقة وتنحت ....
طبعا للكوسة والمحسوبية برده سككها في الحالات دي
يعني ناس جت بعدي ومش بتستني أشاسا
بتدخل علي القتصل عِدل
المهم ... كان فيه واحدة قاعدة جنبي .. شكلها مستنية برده
وماسكة في إيدها ورقة من فئة ال600 برده
مش فئة فلوسية
لأأأأ
فئة سفاراتيه
لسة بتقوللي " انا زهقت من القعدة دي رجلي وجعتني"
لقيت حد بينادي عليها في المايك
وجريت علي الشباك
وهيا خارجة بقولها " ربنا معاكي"
لقيتها بتديني ورقتها فئة ال600
وميلت عليا كإننا بنتاجر في الممنوع
أنا جاتلي واسطة دخلتني قبل الترتيب
خليها معاكي الورقة دي وأدخلي بيها
شكرتها وحسيت إنها إديتني أمل ...
أهو يعني 28 رقم فرق برده
أصل تحسوا إن اللي بيدخل جوا .. مش بيعرف يخرج

هيه وعدي اليوم ....

ولسة فيه أيام تانية في الشيكارة... أأقصد السفارة

العبارة في السفارة

هيا السفارة في العمارة
لأ
طب السفارة في العبارة ..
لأ
طب السفارة في الحرارة ..
برده لأ
طب إيه..
أنا هقولكم
السفارة في شارع الجلاء ......

نويت والنية لله .. أروح سفارة إيطاليا
علشان أخد ختم المحروس التشنجن علي جواز السفر بتاعي
قوم إيييييييييييه
اتصلت بالقنصلية أعرف تفاصيل أكتر
رد عليا واحد آخر جنتله
- حضرتك هتتصلي برقم فودافون 0900 معرفش كام وتاخدي رقم وتسيبي بياناتك وتيجي تلاقي إسمك ورقم جواز سفرك مع حارس البوابة تدخلي تاخدي رقم و تقدمي الورق اللي معاكي"
-- بس كده ..
- آه بس كده
-- طب إيه الورق المطلوب؟
- إدخلي علي الموقع بتاع السفارة هتعرفي كل حاجة..
-- بس كده
- آه بس كده
-- طيب أنا لوعايزة ......................... بيب بيب بيب

قفل ابن التييييييييت

بس والله دي خطوات سهلة جدا
اتصال ومشوار وهووووووب
التشنجن في إيديا يا عنيا

----------------------------
النهاردة إيه يا ميمي النهارده إيه يا ميمي ..
أها .. النهاردة الخميس
أما أقوم أتصل برقم فودافون 0900
أخ .. معنديش الخدمة دي في البيت
طيب اما اروح الشغل يوم السبت هبقي أتصل
رحت الشغل يوم السبت
وبتصل ... سمعت صوت مش بحبه خاااالص
** الرقم المطلوب غييييييير موجود **
يعني إيييييييه ... راح مشوار؟
طب مش يقول؟
عاااااااااااااااااااااا
اتصلت بالدليل ..
** أهلا بكم في الشركة المصرية للاتصالات .. هانم مسعود مع حضرتك ..**
-- أيوة يا هانم ..
- تحت أمرك يا فندم
-- إديني رقم تاني لقنصلية إيطاليا
-رقم فودافون 0900 ..
-- يا هانم مش بيرد ، بيقول غير موجود
- اتفضلي حضرتك رقم تاني ...

أتاري الناس اللي معايا في الشغل سمعوني بقول يا "هانم"
راحوا بيقولوا لبعض ( ميمي إتغيرت خالص ..بقت تتعالي علي الناس وووو ....)

قفشتكوااااااااا
يا عالم يا .... دي البنت إسمها كده..
أبوها سماها كده .. وشغلتها تقول إسمها كده ..
أنا مالي أناااااااااااا
وهوا لازم كلمتين فل كده ع الصبح

ياااااااارب

اتصلت بالرقم اللي الأستاذدة الآنسة / هانم إديتهولي
-- من فضلك الرقم 0900 مش موجود في الخدمة
- يا فندم الرقم خارج الخدمة جمعة وسبت
-- ايوة قول كده .. اتصل امتي؟
- من الأحد للخميس من 9 لحد 2
--شكرا ، سلام

يوم الأحد بتصل وبعد ما خد مني البيانات موظف فودافون
اللي لطعني لمدة 17 دقيقة علي الخط
وعلشان الدقيقة ب 150 قرش
والحسابة بتحسب
إداني المعاد اللي القنصلية قالت عليه
بس المعاد ..............
بعد ......... شهر
أيوة بعد شهر
يعني اللي عاوز يسافر لمؤتمر ولا يعمل عملية
ولا يزور حد من قرايبة .. لازم يتبع التعليمات
ويستني شهر

قلت مبدهاش بأه
أروح السفارة بنفسي .. الناس دي نصابة ولا إيه

اول ما قربت علي البوابة.. قرب مني واحد سألني سؤال غريب أوي
قاللي ( أخدتي معاد فودافون؟)
-- إدوني معاد بعد شهر
- أنا ممكن أجيبلك معاد قبل كده
-- إزاي؟
- مش إزاي..
-- أومال ؟؟
- ب 5000 جنيه
-- كااااااااااااااااااااام؟
- حضرتك المعاد القريب أجيبهولك ب 5000 جنيه
-- لا شكرا
- طب مش عاوزة ورقك يترجم إيطالي؟
-- شوكراااااااااااااااااااان

والبقية في الحلقة القادمة
.
.
.

مخلوقات تغزو مصر

ذكرت وكالة أنباء

" رينج باصالو "
أن هناك مخلوقات فضائية كوكبية حلزونية نهارية ليلية
أحتلت الأراضي المصرية
في توقيت الغدا
يعني قبل المغربية ..

والغريبة ..
الإحتلال شمل كل البيوت ...

ومفيش فروق فردية ...

والتقطت الكاميرات البطروخية

بعض الصور للكائنات المحتلة

أثناء نومها العميق في أطباق طائرة

محاطة بالخس والليمون

ملحوظة :
تظهر الكائنات وتلازمها أعواد من البصل الأخضر
ولا تفارقها أبدا ..

صورة ( 1) وتظهر فيها الكائنات اللولبية وهي تغط في نوم عميق علي الاطباق الطائرة

صورة (2) الأعواد الغليظة الملازمة للكائنات .. ربما تعمل عمل " الــ بودي جارد"

صورة (3) المخلوقات تنظر الي الكاميرا ... يا حفيييييييييظ

المخلوقات الرنجية تتخفي دائما في ستار من الليمون والخس ..

ربنا يستر .. ده إحنا في عيد يا جماعة.
.
.

العيدية أولا ..

كل عام وأنتم بخير ..

يارب بس تكفي
هههههه

عيد فطر سعيد عليكم
يااااااارب
.
.

رمضان كريم

كل عام وأنتم بخير
وتمنياتي لكم بقضاء شهر كله طاعه وتقرب إلي الله
ودعاء في كل وقت
ولا تنسوني من صالح دعائكم

أوعي حد ينسي ميمي ... أعيط أنا
.
.

حزروا فزروا

إبحث

ستجدني في أمامها لا خلفها ولا بداخلها

تجدني في عالمها ... لا في عالمك

أنا لست البئر ولا المنبع ، أنا العين

...

تجدني في خصامها ولومها ولا تجدني في فرحها

تجدني في المهام الصعبة ولا تجدني في المصاعب

إبحث ..

لاتجدني في الأماني ، ولاتجدني في الأمنيات

ولكن أبحث أكثر تجدني في الأمهات ..

هل عرفتم ما هذا ؟

.

.

هابي "شبرانتاين" تو يو

شامط ألب السنين ...

ومعلقه في الجاكتة
لونه علي كل لون ..

مأنتخ في الكارتة
سرحان والموج بياخده ...

في دماغه بسكلتة
واصل ليله نهاره ..

متشعبط في البافتة
رايح علي فين تأزأز؟ ...

غاير في أي حتة..

شعور نغاشيشه واقفة ..

بيطأطأ ف الموكيته

مش عارف ليه ده حاله !!

وبيضرب في الباكيته

وعجبي ......

الكاس دلوقتي معانا

إحنا طبعا بالبطولة فرحانين
حاسة بإيدينا .. يد واحدة مش إيدين
مصري عربي مش بنسأل دول منين
المهم الكاس بتاعنا
ويارب دايما منصورين
*************
شفتوا الشوارع والبيوت؟
ساكتة وملهاش أي صوت؟
كل الكلام كان كلمتين
يا إما " سدد" يا إما "شوط"
بس بعد الكاس ما جانا
وودع الملعب وغانا
يعني المهم إنه معانا
في شارعنا ميييييييين يعرف يفوت !!!

**********
شفت البنات ويا البنين ؟
راسمين علمنا ع الجبين
رافعين رايات النصر ماشيين مبسوطين ؟
ست ـ راجل ـ طفل ـ شب
كله شجع
كله حس وكله حب
كلنا في آخر دقايق
قلبنا من خوفنا .. طب
بس ميييييييييين !!!!!
دول فراعنة ملثمين
لعبوا ... آه
تعبوا لكن .. في النهاية ..... لّعبين
والفرحة دي بترقص في عينهم
كات فرحة منتظرينها سنين
**************
الحقيقة مش حكاية كاس وبس
الحقيقة الغايبة فعلا ...
إننا بنحب مصر
بندعي من قلوبنا ليها
تتنقل بين ألف نصر
ولو بإيدنا تبقي جنة ...
أو عروسة بإيدها حنة
وكل ده لحبك يا مصر
*****************
وإحنا واقفين ضد غانا
كان دعانا
ناخد الكاس ده معانا
وجيبناه معانا ، أهه وكسبنا البطولة
في مطارنا رافعين الرايات
هيا دي يا ناس الرجولة
.
.
.ألف مبروك لمصر
.
.معلش أسفة علي التقصير معاكم كلكم
بس أصل أنجولا بعييييييييد
ههههههههههههه
.
.

هيس هيس .. كله كويس

يا مأمنة للرجال ... يا مأمنه للباسوورد مع الهاكرز والعيال

****

أفتكرلك إيه يا بصلة؟ وأنا في الأساس عندي الزهايمر ..

****

اللي يتلسع من الشوربة ... يحط ميكوناز

****

إديني عمر وإرميني البحر بس اللي في مارينا

****

إيه اللي رماك ع المر ؟ عامل ريجيم يا سيدي

****

اللي علي راسة بطحة ، يادوب غرزتين ويطيب

****

ابعد عن الشر .... وأعمل Sign out بسرررعة

****

بصلة المحب ، متنفعش هدية

****

الفاضي يعمل تشاتينج

****

اللي ياكل علي ضرسة ... يشبع

****

يا مستني السمنة من بطن النملة ،، يااااااااع جتك الأرف

****

االي ميعرفش يقول .. واتس أب مان !!!!

****

اللي بيته من إزاز .. هيستخدم جلانس كتير

****

أطبخي يا جارية.. قضيها تيك أواي بليز يا سيدي

****

لو حبيبك عسل ، بالقشطة إعمله سندوتشات

****

من خرج من داره ، ممكن يتأخر بره

****

ياخبر النهاردة بفلوس ، بكره علي يوتيوب ببلاش
****

لو ليك عند الكلب حاجة قول له هاوهاو

****

ضرب الحبيب زي شرب عصير الكرنب بالحليب

*********************

.

.وأنا أول تعليق

نياهااااااي

الموناستيتة ... عيد ميلادها النهارده

عيد ميلاد الليلة مين؟؟

عيد ميلاد د/ ستيتة

الاحتفال مش هنا ..........

لأ .....

هنـــــــــــــــــــــــــــــا


كل سنة وأنت طيبة يا جمييييييييل
.
.